Shatapatha Brahmana · Verses 10.3-5

yajustadvidhāyaka brāhmaṇam

ayaṃ vāva yajuryo'yaṃ pavate eṣa hi yannevedaṃ sarvaṃ janayatyetaṃ yantamidamanu prajāyate tasmādvāyureva yajuḥ -

ayamevākāśo jūḥ yadidamantarikṣametaṃ hyākāśamanu javate tadetadyajurvāyuścāntarikṣaṃ ca yacca jūśca tasmādyajureṣa eva yadeṣa hyeti tadetadyajurṛksāmayoḥ pratiṣṭhitamṛksāme vahatastasmātsamānairevādhvayurgrahaiḥ karma karotyanyānyanyāni stutaśastrāṇi bhavanti yathā pūrvābhyāṃ syanttvāparābhyāṃ dhāvayettādṛktat -

agnireva puraḥ agniṃ hi puraskṛtyemāḥ prajā upāsata āditya eva caraṇaṃ yadā hyevaiṣa udetyathedaṃ sarvaṃ carati tadetadyajuḥ sapuraścaraṇamadhidevataṃ -

athādhyātmam prāṇa eva yajuḥ prāṇo hi yannevedaṃ sarvaṃ janayati prāṇaṃ yantamidamanu prajāyate tasmātprāṇa eva yajuḥ -

ayamevākāśo jūḥ yo'yamantarātmannākāśa etaṃ hyākāśamanu javate tadetadyajuḥ prāṇaścākāśaśca yacca jūśca tasmādyajuḥ prāṇa eva yatprāṇo hyeti -

annameva yajuḥ annena hi jāyate'nnena javate tadetadyajuranne pratiṣṭhitamannaṃ vahati tasmātsamāna eva prāṇe'nyadanyadannaṃ dhīyate -

mana eva puraḥ mano hi prathamaṃ prāṇānāṃ cakṣureva caraṇaṃ cakṣuṣā hyayamātmā carati tadetadyajuḥ sapuraścaraṇamadhidevataṃ cādhyātmaṃ ca pratiṣṭhitaṃ sa yo haitadevaṃ yajuḥ sapuraścaraṇamadhidevataṃ cādhyātmaṃ ca pratiṣṭhitaṃ veda -

ariṣṭo haivānārtaḥ/ svasti yajñasyodṛcamaśnute svānāṃ śreṣṭhaḥ pura etā bhavatyannādo'dhipatirya evaṃ veda -

ya u haivaṃvidaṃ sveṣu pratipratirbubhūṣati na haivālaṃ bhāryebhyo bhavatyatha ya evaitamanubhavati yo vai tamanu bhāryānbubhūrṣati sa haivālaṃ bhāryebhyo bhavati -

tadetajjyeṣṭhaṃ brahma na hyetasmātkiṃ cana jyāyo'sti jyeṣṭho ha vai śreṣṭhaḥ svānāṃ bhavati ya evaṃ veda -

tadetadbrahmāpūrvamaparavat sa yo haitadevaṃ brahmāpūrvamaparavadveda na hāsmātkaścana śreyāntsamāneṣu bhavati śreyāṃsaḥ śreyāṃso haivāsmādaparapuruṣā jāyante tasmādyo'smājjyāyāntsyāddiśo'smātpūrvā ityupāsīta tatho hainaṃ na hinasti -

tasya vā etasya yajuṣaḥ rasa evopaniṣattasmādyāvanmātreṇa yajuṣādhvaryurgrahaṃ gṛhṇāti sa ubhe stutaśastre anuvibhavatyubhe stutaśastre anuvyaśnute tasmādyāvanmātra ivānnasya rasaḥ sarvamannamavati sarvamannamanuvyeti -

tṛptirevāsya gatiḥ tasmādyadānnasya tṛpyatyatha sa gata iva manyata ānanda evāsya vijñānamātmā''nandātmāno haiva sarve devāḥ sā haiṣaiva devānāmaddhā vidyā sa ha sa na manuṣyo ya evaṃviddevānāṃ haiva sa ekaḥ -

etaddha sma vai tadvidvānpriyavrato rauhiṇāyana āha vāyuṃ vāntamānandasta ātmeto vā vāhīto veti sa ha sma tathaiva vāti tasmādyāṃ deveṣvāśiṣamicchedetenaivopatiṣṭhetānando vā ātmā'sau me kāmaḥ sa me samṛdhyatāmiti saṃ haivāsmai sa kāma ṛdhyate yatkāmo bhavatyetāṃ ha vai tṛptimetāṃ gatimetamānandametamātmānamabhisambhavati ya evaṃ veda -

tadetadyajurupāṃśvaniruktam/ prāṇo vai yajurupāṃśvāyatano vai prāṇastadya enaṃ nirbruvantaṃ brūyādaniruktāṃ devatāṃ niravocatprāṇa enaṃ hāsyatīti tathā haiva syāt -

tasya ha yo niruktamāvirbhāvaṃ veda āvirbhavati kīrtyā yaśasopāṃśu yajuṣādhvaryurgrahaṃ gṛhṇāti gṛhītaḥ sanna āvirbhavatyupāṃśu yajuṣāgniṃ cinoti citaḥ saṃcita āvirbhavatyupāṃśu yajuṣā havirnirvapati śṛtaṃ niṣṭhitamāvirbhavatyevaṃ yatkiṃ copāṃśu karoti kṛtaṃ niṣṭhitamāvirbhavati tasya ha ya etamevaṃ niruktamāvirbhāvaṃ vedāvirbhavati kīrtyā yaśasā brahmavarcasena kṣipra u haivāvidaṃ gacchati sa ha yajureva bhavati yajuṣainamācakṣate -