શતપથબ્રાહ્મણમ્ · શ્લોક 10.3-6

પ્રાણો ગાયત્રી ચક્ષુરુષ્ણિગ્વાગનુષ્ટુમ્મનો બૃહતી શ્રોત્રં પઙ્ક્તિર્ય એવાયં પ્રજનનઃ પ્રાણ એષ ત્રિષ્ટુબથ યોઽયમવાઙ્પ્રાણ એષ જગતી તાનિ વા એતાનિ સપ્ત છન્દાંસિ ચતુરુત્તરાણ્યગ્નૌ ક્રિયન્તે -

પ્રાણો ગાયત્રીતિ તદ્ય એવ પ્રાણસ્ય મહિમા યદ્વીર્યં તદેતત્સહસ્રં પ્રાણસ્યૈવૈતદ્વીર્યં યદ્ધ્યસ્ય ચિન્વતઃ પ્રાણ ઉત્ક્રામેત્તત એવૈષોઽગ્નિર્ન ચીયેતૈતેનૈવાસ્ય રૂપેણ સહસ્રમેષ ગાયત્રીઃ સંચિતો ભવતિ -

ચક્ષુરુષ્ણિગિતિ તદ્ય એવ ચક્ષુષો મહિમા યદ્વીર્યં તદેતત્સહસ્રં ચક્ષુષ એવૈતદ્વીર્યં યદ્ધ્યસ્ય ચિન્વતશ્ચક્ષુરુત્ક્રામેત્તત એવૈષોઽગ્નિર્ન ચીયેતૈતેનૈવાસ્ય રૂપેણ સહસ્રમેષ ઉષ્ણિહઃ સંચિતો ભવતિ -

વાગનુષ્ટુબિતિ તદ્ય એવ વાચો મહિમા યદ્વીર્યં તદેતત્સહસ્રં વાચ એવૈતદ્વીર્યં યદ્ધ્યસ્ય ચિન્વતો વાગુત્ક્રામેત્તત એવૈષોઽગ્નિર્ન ચીયેતૈતેનૈવાસ્ય રૂપેણ સહસ્રમેષોઽનુષ્ટુભઃ સંચિતો ભવતિ -

મનો બૃહતીતિ તદ્ય એવ મનસો મહિમા યદ્વીર્યં તદેતત્સહસ્રં મનસ એવૈતદ્વીર્યં યદ્ધ્યસ્ય ચિન્વતો મન ઉત્ક્રામેત્તત એવૈષોઽગ્નિર્ન ચીયેતૈતેનૈવાસ્ય રૂપેણ સહસ્રમેષ બૃહતીઃ સંચિતો ભવતિ -

શ્રોત્રં પઙ્ક્તિરિતિ તદ્ય એવ શ્રોત્રસ્ય મહિમા યદ્વીર્યં તદેતત્સહસ્રં શ્રોત્રસ્યૈવૈતદ્વીર્યં યદ્ધ્યસ્ય ચિન્વતઃ શ્રોત્રમુત્ક્રામેત્તત એવૈષોઽગ્નિર્ન ચીયેતૈતેનૈવાસ્ય રૂપેણ સહસ્રમેષ પઙ્ક્તીઃ સંચિતો ભવતિ -

ય એવાયં પ્રજનનઃ પ્રાણઃ એષ ત્રિષ્ટુબિતિ તદ્ય એવૈતસ્ય પ્રાણસ્ય મહિમા યદ્વીર્યં તદેતત્સહસ્રમેતસ્યૈવૈતત્પ્રાણસ્ય વીર્યં યદ્ધ્યસ્ય ચિન્વત એષ પ્રાણ આલુભ્યેત્તત એવૈષોઽગ્નિર્ન ચીયેતૈતેનૈવાસ્ય રૂપેણ સહસ્રમેષ ત્રિષ્ટુભઃ સંચિતો ભવતિ -

અથ યોઽયમવાઙ્પ્રાણઃ। એષ જગતીતિ તદ્ય એવૈતસ્ય પ્રાણસ્ય મહિમા યદ્વીર્યં તદેતત્સહસ્રમેતસ્યૈવૈતત્પ્રાણસ્ય વીર્યં યદ્ધ્યસ્ય ચિન્વત એષ પ્રાણ આલુભ્યેત્તત એવૈષોઽગ્નિર્ન ચીયેતૈતેનૈવાસ્ય રૂપેણ સહસ્રમેષ જગતીઃ સંચિતો ભવતિ -

તાનિ વા એતાનિ સપ્ત ચ્છન્દાંસિ ચતુરુત્તરાણ્યન્યોઽન્યસ્મિન્પ્રતિષ્ઠિતાનિ સપ્તેમે પુરુષે પ્રાણા અન્યોઽન્યસ્મિન્પ્રતિષ્ઠિતાસ્તદ્યાવન્તમેવંવિચ્છન્દસાં ગણમન્વાહ ચ્છન્દસશ્છન્દસો હૈવાસ્ય સોઽનૂક્તો ભવતિ સ્તુતો વા શસ્તો વોપહિતો વા -