શતપથબ્રાહ્મણમ્ · શ્લોક 10.3-5

યજુસ્તદ્વિધાયક બ્રાહ્મણમ્

અયં વાવ યજુર્યોઽયં પવતે એષ હિ યન્નેવેદં સર્વં જનયત્યેતં યન્તમિદમનુ પ્રજાયતે તસ્માદ્વાયુરેવ યજુઃ -

અયમેવાકાશો જૂઃ યદિદમન્તરિક્ષમેતં હ્યાકાશમનુ જવતે તદેતદ્યજુર્વાયુશ્ચાન્તરિક્ષં ચ યચ્ચ જૂશ્ચ તસ્માદ્યજુરેષ એવ યદેષ હ્યેતિ તદેતદ્યજુરૃક્સામયોઃ પ્રતિષ્ઠિતમૃક્સામે વહતસ્તસ્માત્સમાનૈરેવાધ્વયુર્ગ્રહૈઃ કર્મ કરોત્યન્યાન્યન્યાનિ સ્તુતશસ્ત્રાણિ ભવન્તિ યથા પૂર્વાભ્યાં સ્યન્ત્ત્વાપરાભ્યાં ધાવયેત્તાદૃક્તત્ -

અગ્નિરેવ પુરઃ અગ્નિં હિ પુરસ્કૃત્યેમાઃ પ્રજા ઉપાસત આદિત્ય એવ ચરણં યદા હ્યેવૈષ ઉદેત્યથેદં સર્વં ચરતિ તદેતદ્યજુઃ સપુરશ્ચરણમધિદેવતં -

અથાધ્યાત્મમ્ પ્રાણ એવ યજુઃ પ્રાણો હિ યન્નેવેદં સર્વં જનયતિ પ્રાણં યન્તમિદમનુ પ્રજાયતે તસ્માત્પ્રાણ એવ યજુઃ -

અયમેવાકાશો જૂઃ યોઽયમન્તરાત્મન્નાકાશ એતં હ્યાકાશમનુ જવતે તદેતદ્યજુઃ પ્રાણશ્ચાકાશશ્ચ યચ્ચ જૂશ્ચ તસ્માદ્યજુઃ પ્રાણ એવ યત્પ્રાણો હ્યેતિ -

અન્નમેવ યજુઃ અન્નેન હિ જાયતેઽન્નેન જવતે તદેતદ્યજુરન્ને પ્રતિષ્ઠિતમન્નં વહતિ તસ્માત્સમાન એવ પ્રાણેઽન્યદન્યદન્નં ધીયતે -

મન એવ પુરઃ મનો હિ પ્રથમં પ્રાણાનાં ચક્ષુરેવ ચરણં ચક્ષુષા હ્યયમાત્મા ચરતિ તદેતદ્યજુઃ સપુરશ્ચરણમધિદેવતં ચાધ્યાત્મં ચ પ્રતિષ્ઠિતં સ યો હૈતદેવં યજુઃ સપુરશ્ચરણમધિદેવતં ચાધ્યાત્મં ચ પ્રતિષ્ઠિતં વેદ -

અરિષ્ટો હૈવાનાર્તઃ। સ્વસ્તિ યજ્ઞસ્યોદૃચમશ્નુતે સ્વાનાં શ્રેષ્ઠઃ પુર એતા ભવત્યન્નાદોઽધિપતિર્ય એવં વેદ -

ય ઉ હૈવંવિદં સ્વેષુ પ્રતિપ્રતિર્બુભૂષતિ ન હૈવાલં ભાર્યેભ્યો ભવત્યથ ય એવૈતમનુભવતિ યો વૈ તમનુ ભાર્યાન્બુભૂર્ષતિ સ હૈવાલં ભાર્યેભ્યો ભવતિ -

તદેતજ્જ્યેષ્ઠં બ્રહ્મ ન હ્યેતસ્માત્કિં ચન જ્યાયોઽસ્તિ જ્યેષ્ઠો હ વૈ શ્રેષ્ઠઃ સ્વાનાં ભવતિ ય એવં વેદ -

તદેતદ્બ્રહ્માપૂર્વમપરવત્ સ યો હૈતદેવં બ્રહ્માપૂર્વમપરવદ્વેદ ન હાસ્માત્કશ્ચન શ્રેયાન્ત્સમાનેષુ ભવતિ શ્રેયાંસઃ શ્રેયાંસો હૈવાસ્માદપરપુરુષા જાયન્તે તસ્માદ્યોઽસ્માજ્જ્યાયાન્ત્સ્યાદ્દિશોઽસ્માત્પૂર્વા ઇત્યુપાસીત તથો હૈનં ન હિનસ્તિ -

તસ્ય વા એતસ્ય યજુષઃ રસ એવોપનિષત્તસ્માદ્યાવન્માત્રેણ યજુષાધ્વર્યુર્ગ્રહં ગૃહ્ણાતિ સ ઉભે સ્તુતશસ્ત્રે અનુવિભવત્યુભે સ્તુતશસ્ત્રે અનુવ્યશ્નુતે તસ્માદ્યાવન્માત્ર ઇવાન્નસ્ય રસઃ સર્વમન્નમવતિ સર્વમન્નમનુવ્યેતિ -

તૃપ્તિરેવાસ્ય ગતિઃ તસ્માદ્યદાન્નસ્ય તૃપ્યત્યથ સ ગત ઇવ મન્યત આનન્દ એવાસ્ય વિજ્ઞાનમાત્માઽઽનન્દાત્માનો હૈવ સર્વે દેવાઃ સા હૈષૈવ દેવાનામદ્ધા વિદ્યા સ હ સ ન મનુષ્યો ય એવંવિદ્દેવાનાં હૈવ સ એકઃ -

એતદ્ધ સ્મ વૈ તદ્વિદ્વાન્પ્રિયવ્રતો રૌહિણાયન આહ વાયું વાન્તમાનન્દસ્ત આત્મેતો વા વાહીતો વેતિ સ હ સ્મ તથૈવ વાતિ તસ્માદ્યાં દેવેષ્વાશિષમિચ્છેદેતેનૈવોપતિષ્ઠેતાનન્દો વા આત્માઽસૌ મે કામઃ સ મે સમૃધ્યતામિતિ સં હૈવાસ્મૈ સ કામ ઋધ્યતે યત્કામો ભવત્યેતાં હ વૈ તૃપ્તિમેતાં ગતિમેતમાનન્દમેતમાત્માનમભિસમ્ભવતિ ય એવં વેદ -

તદેતદ્યજુરુપાંશ્વનિરુક્તમ્। પ્રાણો વૈ યજુરુપાંશ્વાયતનો વૈ પ્રાણસ્તદ્ય એનં નિર્બ્રુવન્તં બ્રૂયાદનિરુક્તાં દેવતાં નિરવોચત્પ્રાણ એનં હાસ્યતીતિ તથા હૈવ સ્યાત્ -

તસ્ય હ યો નિરુક્તમાવિર્ભાવં વેદ આવિર્ભવતિ કીર્ત્યા યશસોપાંશુ યજુષાધ્વર્યુર્ગ્રહં ગૃહ્ણાતિ ગૃહીતઃ સન્ન આવિર્ભવત્યુપાંશુ યજુષાગ્નિં ચિનોતિ ચિતઃ સંચિત આવિર્ભવત્યુપાંશુ યજુષા હવિર્નિર્વપતિ શૃતં નિષ્ઠિતમાવિર્ભવત્યેવં યત્કિં ચોપાંશુ કરોતિ કૃતં નિષ્ઠિતમાવિર્ભવતિ તસ્ય હ ય એતમેવં નિરુક્તમાવિર્ભાવં વેદાવિર્ભવતિ કીર્ત્યા યશસા બ્રહ્મવર્ચસેન ક્ષિપ્ર ઉ હૈવાવિદં ગચ્છતિ સ હ યજુરેવ ભવતિ યજુષૈનમાચક્ષતે -