Shatapatha Brahmana · Verses 10.3-4

tadāhuḥ kiṃ chandaḥ kā devatāgneḥ śira iti gāyatrī chando'gnirdevatā śiraḥ -

kiṃ chandaḥ kā devatā grīvā ityuṣṇikchandaḥ savitā devatā grīvāḥ -

kiṃ chandaḥ kā devatānūkamiti bṛhatī chando bṛhaspatirdevatānūkam -

kiṃ chandaḥ kā devatā pakṣāviti bṛhadrathantare cchando dyāvāpṛthivī devate pakṣau -

kiṃ chandaḥ kā devatā madhyamiti triṣṭupchanda indro devatā madhyam -

kiṃ chandaḥ kā devatā śroṇī iti jagatī chanda ādityo devatā śroṇī -

kiṃ chandaḥ kā devatā yasmādidaṃ prāṇādretaḥ sicyata ityaticchandāśchandaḥ prajāpatirdevatā -

kiṃ chandaḥ kā devatā yo'yamavāṅprāṇa iti yajñāyajñiyaṃ chando vaiśvānaro devatā -

kiṃ chandaḥ kā devatorū ityanuṣṭupchando viśve devā devatorū -

kiṃ chandaḥ kā devatā'ṣṭhīvantāviti paṅktiśchando maruto devatā'ṣṭhīvantau -

kiṃ chandaḥ kā devatā pratiṣṭhe iti dvipadā cchando viṣṇurdevatā pratiṣṭhe -

kiṃ chandaḥ kā devatā prāṇā iti vicchandāśchando vāyurdevatā prāṇāḥ -

kiṃ chandaḥ kā devatonātiriktānīti nyūnākṣarā chanda āpo devatonātiriktāni saiṣā''vidyaivaitanmayo haivaitā devatā etamātmānamabhisambhavati na hātrānyā lokyatāyā āśīrasti -