Scripture Library

Shatapatha Brahmana · Chapter 10.2.2

10.2.2.10.2.2

cityāgneḥ saptapuruṣapramāṇatāyā vidhānam

10.2.2.10.2.2.1

yānvai tāntsapta puruṣān ekaṃ puruṣamakurvantsa prajāpatirabhavatsa prajā asṛjata sa prajāḥ sṛṣṭvordhva udakrāmatsa etaṃ lokamagacchadyatraiṣa etattapati no ha tarhyanya etasmādatra yajñiya āsa taṃ devā yajñenaiva yaṣṭumadhriyanta -

10.2.2.10.2.2.2

tasmādetadṛṣiṇābhyanūktam yajñena yajñamayajanta devā iti yajñena hi taṃ yajñamayajanta devāstāni dharmāṇi prathamānyāsanniti te hi dharmāḥ prathame'kriyanta te ha nākaṃ mahimānaḥ sacanteti svargo vai loko nāko devā mahimānaste devāḥ svargaṃ lokaṃ sacanta ye taṃ yajñamayajannityetat -

10.2.2.10.2.2.3

yatra pūrve sādhyāḥ santi devā iti prāṇā vai sādhyā devāsta etamagra evamasādhayannetadeva bubhūṣantasta u evāpyetarhi sādhayanti paścedamanyadabhavadyajatramamartyasya bhuvanasya bhūneti paścā haivedamanyadyajñiyamāsa yatkiṃ cāmṛtam -

10.2.2.10.2.2.4

suparṇo aṅga saviturgarutmān pūrvo jātaḥ sa u asyānu dharmeti prajāpatirvai suparṇo garutmāneṣa savitaitasya prajāpatiranu dharmamityetat -

10.2.2.10.2.2.5

sa vai saptapuruṣo bhavati saptapuruṣo hyayaṃ puruṣo yaccatvāra ātmā trayaḥ pakṣapucchāni catvāro hi tasya puruṣasyātmā trayaḥ pakṣapucchāni -

10.2.2.10.2.2.6

taṃ vā udbāhunā puruṣeṇa mimīte/ puruṣo vai yajñastenedaṃ sarvaṃ mitaṃ tasyaiṣā paramā mātrā yadudbāhustadyāsya paramā mātrā tāmasya tadāpnoti tayainaṃ tanmimīte tatropa yatprapadenābhyucchrito bhavati tatpariśridbhirāpnoti tasmādu bāhyenaiva lekhāṃ pariśridbhyaḥ khanet -

10.2.2.10.2.2.7

atha pakṣayoraratnī upādadhāti pakṣayostadvīryaṃ dadhāti bāhū vai pakṣau bāhubhyāmu vā annamadyate'nnāyaiva tamavakāśaṃ karoti tadyatpakṣayoraratnī upādadhātyaratnimātrāddhyannamadyate -

10.2.2.10.2.2.8

atha pucche vitastimupādadhāti pratiṣṭhāyāṃ tadvīryaṃ dadhāti pratiṣṭhā vai pucchaṃ hasto vitastirhastena vā annamadyate'nnāyaiva tamavakāśaṃ karoti tadyatpucche vitastimupādadhātyanna evainaṃ tatpratiṣṭhāpayati tadyattatra kanīya upādadhātyanne hyevainaṃ tatpratiṣṭhāpayatyatho etāvadvā idaṃ mitaṃ bhavatyetāvadidaṃ tadyadevaṃ mimīta etasyaivāptyai -

Original text: śatapathabrāhmaṇam · Sanskrit Wikisource contributors · Sanskrit Wikisource · CC BY-SA 4.0