Shatapatha Brahmana · Chapter 10.2.3

prākṛtasya saptavidhasyāgnervaikṛteṣvantyasyaikaśatavidhasyāgneśca vedimānam

yā vā iyaṃ vediḥ saptavidhasya eṣā vedermātrā sa devayajanamadhyavasāya pūrvayā dvārā patnīśālaṃ prapadya gārhapatyāyoddhatyāvokṣati gārhapatyasyoddhatātsapta prācaḥ prakramānprakrāmati tataḥ prāñcaṃ vyāmaṃ vimimīte tasya madhya'āhavanīyāyoddhatyāvokṣati pūrvārddhādvyāmasya trīnprācaḥ prakramānprakrāmati sa vedyantaḥ -

te vā ete vyāmaikādaśāḥ prakramā antarā vedyantaṃ ca gārhapatyaṃ caikādaśākṣarā triṣṭubvajrastriṣṭubvīryaṃ triṣṭubvajreṇaivaitadvīryeṇa yajamānaḥ purastādyajñamukhādrakṣāṃsi nāṣṭrā apahanti -

saiṣā vederyoniḥ etasyai vai yonerdevā vediṃ prājanayannatha ya eṣa vyāmaḥ sā gārhapatyasya yoniretasyai vai yonerdevā gārhapatyaṃ prājanayangārhapatyādāhavanīyam -

sa vedyantāt ṣaṭtriṃśatprakramāṃ prācīṃ vediṃ vimimīte triṃśataṃ paścāttiraścīṃ caturviṃśatiṃ purastāttannavatiḥ saiṣā navatiprakramā vedistasyāṃ saptavidhamagniṃ vidadhāti -

tadāhuḥ kathameṣa saptavidha etayā vedyā sampadyata iti daśa vā ime puruṣe prāṇāścatvāryaṅgānyātmā pañcadaśa evaṃ dvitīya'evaṃ tṛtīye ṣaṭsu puruṣeṣu navatirathaikaḥ puruṣo'tyeti pāṅkto vai puruṣo loma tvaṅmāṃsamasthi majjā pāṅkto iyaṃ vediścatasro diśa ātmā pañcamyevameṣa saptavidha etayā vedyā sampadyate -

taddhaike uttarā vidhā vidhāsyanta etāṃśca prakramānetaṃ ca vyāmamanuvardhayanti yonimanuvardhayāma iti na tathā kuryānna vai jātaṃ garbhaṃ yoniranuvardhate yāvadvāva yonāvantargarbho bhavati tāvadeva yonirvardhata etāvatyu vā atra garbhasya vṛddhiḥ -

te ye ha tathā kurvanti etaṃ ha te pitaraṃ prajāpatiṃ sampadaścyāvayanti ta iṣṭvā pāpīyāṃso bhavanti pitaraṃ hi prajāpatiṃ sampadaścyāvayanti sā yāvatyeṣā saptavidhasya vedistāvatīṃ caturdaśa kṛtva ekaśatavidhasya vediṃ vimimīte -

atha ṣaṭtriṃśatprakramāṃ rajjuṃ mimīte tāṃ saptadhā samasyati tasyai trīnbhāgānprāca upadadhāti niḥsṛjati caturaḥ -

atha triṃśatprakramāṃ mimīte tāṃ saptadhā samasyati tasyai trīnbhāgānpaścādupadadhāti niḥsṛjati caturaḥ -

atha caturviṃśatiprakramāṃ mimīte tāṃ saptadhā samasyati tasyai trīnbhāgānpurastādupadadhāti niḥsṛjati catura iti nu vedivimānam -

athāgnervidhāḥ aṣṭāviṃśatiḥ prāñcaḥ puruṣā aṣṭāviṃśatistiryañcaḥ sa ātmā caturdaśa puruṣā dakṣiṇaḥ pakṣaścaturdaśottaraścaturdaśa pucchaṃ caturdaśāratnīndakṣiṇe pakṣa upadadhāti caturdaśottare caturdaśa vitastīḥ puccha iti nvaṣṭānavateḥ puruṣāṇāṃ mātrā sādhimānānām -

atha tripuruṣāṃ rajjuṃ mimīte tāṃ saptadhā samasyati tasyai caturobhāgānātmannupadadhāti trīnpakṣapuccheṣu -

athāratnimātrīṃ mimīte tāṃ saptadhā samasyati tasyai trīnbhāgāndakṣiṇe pakṣa upadadhāti trīnevottare niḥsṛjati caturaḥ -

atha vitastimātrīṃ mimīte tāṃ saptadhā samasyati tasyai trīnbhāgānpuccha upadadhāti niḥsṛjati catura evameṣa ekaśatavidha etayā vedyā sampadyate -

tadāhuḥ yattrayodaśa puruṣā atiyanti kathamete sampado na cyavanta iti yā vā etasya saptamasya puruṣasya sampatsaivaiteṣāṃ sarveṣāṃ sampat -

atho āhuḥ prajāpatirevātmānaṃ vidhāya tasya yatra yatra nyūnamāsīttadetaiḥ samāpūrayata teno evāpi sampanna iti -

taddhaike ekavidhaṃ prathamaṃ vidadhatyathaikottaramā'parimitavidhānna tathā kuryāt -

saptavidho vā agre prajāpatirasṛjyata sa ātmānaṃ vidadhāna aitsa ekaśatavidhe'tiṣṭhata sa yo'rvācīnaṃ saptavidhādvidhatta etaṃ ha sa pitaraṃ prajāpatiṃ vicchinatti sa iṣṭvā pāpīyānbhavati yathā śreyāṃsaṃ hiṃsitvātha sa ekaśatavidhamatividhatte'smātsa sarvasmādbahirddhā niṣpadyate sarvamu hīdaṃ prajāpatistasmādu saptavidhameva prathamaṃ vidadhītāthaikottaramaikaśatavidhādekaśatavidhaṃ tu nātividadhīta nāhaitaṃ pitaraṃ prajāpatiṃ vicchinatti no asmātsarvasmādbahirddhā niṣpadyate -