Shatapatha Brahmana · Chapter 10.1.5

sarve haite yajñā yo'yamagniścitaḥ sa yatpaśumālabhate tadagnyādheyamatha yadukhāṃ sambharati tānyagnyādheyahavīṃṣyatha yaddīkṣate tadagnihotramatha yaddīkṣitaḥ samidhāvādadhāti te agnihotrāhutī -

te vai sāyaṃprātarādadhāti sāyaṃprātarhyagnihotrāhutī juhvati samānena mantreṇa samānena hi mantreṇāgnihotrāhutī juhvatyatha yadvanīvāhanaṃ ca bhasmanaścābhyavaharaṇaṃ tau darśapūrṇamāsāvatha yadgārhapatyaṃ cinoti tāni cāturmāsyānyatha yadūrdhvaṃ gārhapatyādā sarvauṣadhāttā iṣṭayo'tha yadūrdhvaṃ sarvauṣadhātprācīnaṃ citibhyaste paśubandhā ya evaiteṣu yajñeṣu viṣṇukramāste viṣṇukramā yajjapyaṃ tadvātsapram -

saumyo'dhvaraḥ prathamā citiḥ yatprācīnaṃ savebhyo rājasūyo dvitīyā vājapeyastṛtīyāśvamedhaścaturthyagnisavaḥ pañcamī yaiścitaṃ sāmabhiḥ parigāyati tanmahāvratamatha yattatrodgātuḥ purastājjapyaṃ tacchatarudriyaṃ vasordhārā mahadukthamatha yadūrdhvaṃ sāmabhyaḥ prācīnaṃ vasordhārāyai yadeva tatra hotuḥ purastājjapyaṃ tattadatha yadūrdhvaṃ vasordhārāyai te gṛhamedhā etāvanto vai sarve yajñāstānagninā''pnoti -

athāto yajñavīryāṇāmeva sāyaṃprātarha vā amuṣmiṃloke'gnihotrahudaśnāti tāvatīha tasminyajña ūrgardhamāse'rdhamāse darśapūrṇamāsayājī caturṣu caturṣu māseṣu cāturmāsyayājī ṣaṭsu ṣaṭsu paśubandhayājī saṃvatsare saṃvatsare somayājī śate śate saṃvatsareṣvagnicitkāmamaśnāti kāmaṃ na taddhaitadyāvacchataṃ saṃvatsarāstāvadamṛtamanantamaparyantaṃ sa so haitadevaṃ vedaivaṃ haivāsyaitadamṛtamanantamaparyantaṃ bhavati tasya yadapīṣīkayevopahanyāttadevāsyāmṛtamanantamaparyantaṃ bhavati -