Shatapatha Brahmana · Chapter 10.1.4

ubhayaṃ haitadagre prajāpatirāsa martyaṃ caivāmṛtaṃ ca tasya prāṇā evāmṛtā āsuḥ śarīraṃ martyaṃ sa etena karmaṇaitayāvṛtaikadhājaramamṛtamātmānamakuruta tathaivaitadyajamāna ubhayameva bhavati martyaṃ caivāmṛtaṃ ca tasya prāṇā evāmṛtā bhavanti śarīraṃ martyaṃ sa etena karmaṇaitayāvṛtaikadhājaramamṛtamātmānaṃ kurute -

sa prathamāṃ citiṃ cinoti sā hāsyaiṣā prāṇa eva tadvai tadamṛtamṛtaṃ hi prāṇaḥ saiṣāmṛtacitiratha purīṣaṃ nivapati taddhāsyaitanmajjaiva tadvai tanmartyammartyo hi majjā tadetasminnamṛte pratiṣṭhāpayati tenāsyaitadamṛtaṃ bhavati -

dvitīyāṃ citiṃ cinoti sā hāsyaiṣāpāna eva tadvai tadamṛtamamṛtaṃ hyapānaḥ saiṣā'mṛtacitistadetanmartyamubhayato'mṛtena parigṛhṇāti tenāsyaitadamṛtambhavatyatha purīṣaṃ nivapati taddhāsyaitadasthyeva tadvai tanmartyaṃ martyaṃ hyasthi tadetasminnamṛte pratiṣṭhāpayati tenāsyaitadamṛtaṃ bhavati -

tṛtīyāṃ citiṃ cinoti sā hāsyaiṣā vyāna eva tadvai tadamṛtamamṛtaṃ hi vyānaḥ saiṣāmṛtacitistadetanmartyamubhayato'mṛtena parigṛhṇāti tenāsyaitadamṛtambhavatyatha purīṣaṃ nivapati taddhāsyaitatsnāvaiva tadvai tanmartyaṃ martyaṃ hi snāva tadetasminnamṛte pratiṣṭhāpayati tenāsyaitadamṛtaṃ bhavati -

caturthīṃ citiṃ cinoti sā hāsyaiṣodāna eva tadvai tadamṛtamamṛtaṃ hyudānaḥ saiṣāmṛtacitistadetanmartyamubhayato'mṛtena parigṛhṇāti tenāsyaitadamṛtambhavatyatha purīṣaṃ nivapati taddhāsyaitanmāṃsameva tadvai tanmartyaṃ martyaṃ hi māṃsaṃ tadetasminnamṛte pratiṣṭhāpayati tenāsyaitadamṛtaṃ bhavati -

pañcamīṃ citiṃ cinoti sā hāsyaiṣā samāna eva tadvai tadamṛtamamṛtaṃ hi samānaḥ saiṣāmṛtacitistadetanmartyamubhayato'mṛtena parigṛhṇāti tenāsyaitadamṛtambhavatyatha purīṣaṃ nivapati taddhāsyaitanmeda eva tadvai tanmartyaṃ martyaṃ hi medastadetasminnamṛte pratiṣṭhāpayati tenāsyaitadamṛtaṃ bhavati -

ṣaṣṭhīṃ citiṃ cinoti sā hāsyaiṣā vāgeva tadvai tadamṛtamamṛtaṃ hi vāk saiṣāmṛtacitistadetanmartyamubhayato'mṛtena parigṛhṇāti tenāsyaitadamṛtambhavatyatha purīṣaṃ nivapati taddhāsyaitadasṛgeva tvageva tadvai tanmartyammartyaṃ hyasṛṅmartyā tvaktadetasminnamṛte pratiṣṭhāpayati tenāsyaitadamṛtambhavati -

tā vā etāḥ ṣaḍiṣṭakācitayaḥ ṣaṭpurīṣacitayastaddvādaśa dvādaśa māsāḥ saṃvatsaraḥsaṃvatsaro'gniryāvānagniryāvatyasya mātrā tāvataiva tatprajāpatirekadhājaramamṛtamātmānamakuruta tathaivaitadyajamāna ekadhājaramamṛtamātmānaṃ kurute -

atha vikarṇīṃ ca svayamātṛṇāṃ copadhāya hiraṇyaśakalaiḥprokṣatyagnimabhyādadhāti rūpameva tatprajāpatirhiraṇmayamantata ātmano'kuruta tadyadantatastasmādidamantyamātmano rūpaṃ tasmādāhurhiraṇmayaḥ prajāpatiriti tathaivaitadyajamāno rūpameva hiraṇmayamantata ātmanaḥ kurute tadyadantatastasmādidamantyamātmano rūpaṃ tasmādye caitadvidurye ca na hiraṇmayo'gnicidamuṣmiṃloke sambhavatītyevāhuḥ -

taddhaitacchāṇḍilyaśca sāptarathavāhaniśca ācāryāntevāsinau vyūdāte rūpamevāsyaitaditi ha smāha śāṇḍilyo lomānīti sāptarathavāhaniḥ -

sa hovāca śāṇḍilyaḥ rūpaṃ vāva lomavadrūpamalomakaṃ rūpamevāsyaitaditi tadvaitattathā yathā tacchāṇḍilya uvāca saṃcite'gniḥ praṇīyate praṇītādūrdhvaṃ samidha āhutaya iti hūyante -

prāṇena vai devā annamadanti agniru devānāṃ prāṇastasmātprāgdevebhyo juhvati prāṇena hi devā annamadantyapānena manuṣyā annamadanti tasmātpratyaṅmanuṣyeṣvannaṃ dhīyate'pānena hi manuṣyā annamadanti -

tadāhuḥ na vayaso'gnicidaśnīyādvayo vā eṣa rūpaṃ bhavati yo'gniṃ cinuta īśvaraārtimātostasmānna vayaso'gnicidaśnīyāditi tadvai kāmamevaivaṃvidaśnīyādagnervā eṣa rūpaṃ bhavati yo'gniṃ cinute sarvaṃ vā idamagnerannaṃ sarvaṃ ma idamannamityevaivaṃvidvidyāditi -

tadāhuḥ kiṃ tadagnau kriyate yena yajamānaḥ punarmṛtyumapajayatītyagnirvā eṣa devatā bhavati yo'gniṃ cinute'mṛtamu vā agniḥ śrīrdevāḥ śriyaṃ gacchati yaśo devā yaśo ha bhavati ya evaṃ veda -