Shatapatha Brahmana · Chapter 10.1.3

prajāpatiḥ prajā asṛjata sa ūrdhvebhya eva prāṇebhyo devānasṛjata ye'vāñcaḥ prāṇāstebhyo martyāḥ prajā athordhvameva mṛtyuṃ prajābhyo'ttāramasṛjata -

tasya ha prajāpateḥ ardhameva martyamāsīdardhamamṛtaṃ tadyadasya martyamāsīttena mṛtyorabibhetsa bibhyādimāṃ prāviśaddvayaṃ bhūtvā mṛccāpaśca -

sa mṛtyurdevānabravīt kva nu so'bhūdyo no'sṛṣṭeti tvadbibhyadimāṃ prāvikṣaditi so'bravīttaṃ vā anvicchāma taṃ sambharāma na vā ahaṃ taṃ hiṃsiṣyāmīti taṃ devā asyā adhi samabharanyadasyāpsvāsīttā apaḥ samabharannatha yadasyāṃ tāṃ mṛdaṃ tadubhayaṃ sambhṛtya mṛdaṃ cāpaśceṣṭakāmakurvaṃstasmādetadubhayamiṣṭakā bhavati mṛccāpaśca -

tadetā vā asya tāḥ pañca martyāstanva āsam̐lloma tvaṅmāṃsamasthi majjā'thaitā amṛtā mano vākprāṇaścakṣuḥ śrotram -

sa yaḥ sa prajāpatiḥ ayameva sa yo'yamagniścīyate'tha yā asya tāḥ pañca martyāstanva āsannetāstāḥ purīṣacitayo'tha yā amṛtā etāstā iṣṭakācitayaḥ -

te devā abruvan amṛtamimaṃ karavāmeti tasyaitābhyāmamṛtābhyāṃ tanūbhyāmetāmmartyāṃ tanūṃ parigṛhyāmṛtāmakurvanniṣṭakācitibhyāṃ purīṣacitiṃ tathā dvitīyāṃ tathā tṛtīyāṃ tathā caturthīm -

atha pañcamīṃ citimupadhāya purīṣaṃ nivapati tatra vikarṇīṃ ca svayamātṛṇāṃ copadadhāti hiraṇyaśakalaiḥ prokṣatyagnimabhyādadhāti sā saptamī citistadamṛtamevamasyaitābhyāmamṛtābhyāṃ tanūbhyāmetāṃ martyāṃ tanūmparigṛhyāmṛtāmakurvanniṣṭakācitibhyāṃ purīṣacitiṃ tato vai prajāpatiramṛto'bhavattathaivaitadyajamāna etamamṛtamātmānaṃ kṛtvā so'mṛto bhavati -

te vai devāstaṃ nāviduḥ yadyenaṃ sarvaṃ vā'kurvanna vā sarvaṃ yadyati vā'recayannavābhyāpayaṃsta etāmṛcamapaśyandhāmacchadagnirindro brahmā devo bṛhaspatiḥ sacetaso viśve devā yajñaṃ prāvantu naḥ śubhe iti -

tasyā astyevāgneyam astyaindramasti vaiśvadevaṃ tadyadasyā āgneyaṃ yadevaitasyāgnerāgneyaṃ tadasya tena samaskurvanyadaindraṃ tadaindreṇa yadvaiśvadevaṃ tadvaiśvadevena tamatraiva sarvaṃ kṛtsnaṃ samaskurvan -

tadyadetayopatiṣṭhate yadevāsyātra vidvānvā'vidvānvā'ti vā recayati na vā'bhyāpayati tadevāsyaitayā sarvamāpnoti yadasya kiṃ cānāptamanuṣṭubdhāmacchadbhavati vāgvā anuṣṭubvāgdhāmacchadvācaivāsya tadāpnoti yadasya kiṃ cānāptaṃ purīṣavatīṃ citiṃ kṛtvopatiṣṭhetetyu haika āhustatra hi sā sarvā kṛtsnā bhavatīti -

tadu vā āhuḥ yaviṣṭhavatyaivopatiṣṭhetaitaddhāsya priyaṃ dhāma yadyaviṣṭha iti tadyadasya priyaṃ dhāma tenāsya tadāpnoti yadasya kiṃ cānāptamāgneyyāgnikarma hi gāyatryā gāyatro'gniryāvānagniryāvatyasya mātrā tāvataivāsya tadāpnoti yadasya kiṃ cānāptamaniruktayā sarvaṃ vā aniruktaṃ sarveṇaivāsya tadāpnoti yadasya kiṃcānāptaṃ tvaṃ yaviṣṭha dāśuṣa iti tasyokto bandhuḥ purīṣavatīṃ citiṃ kṛtvopatiṣṭheta tatra hi sā sarvā kṛtsnā bhavati -