Scripture Library

Shatapatha Brahmana · Verses 1.7-3

1.7-3.1.7.4.1

१.७.४ brahmaṇaḥ prāśitraharaṇam
prajāpatirha vai svāṃ duhitaramabhidadhyau / divaṃ vā uṣasaṃ vā mithunyenayā syāmiti tāṃ sambabhūva -

1.7-3.1.7.4.2

tadvai devānāmāga āsa / ya itthaṃ svāṃ duhitaramasmākaṃ svasāraṃ karotīti -

1.7-3.1.7.4.3

te ha devā ūcuḥ / yo'yaṃ devaḥ paśūnāmīṣṭe'tisaṃdhaṃ vā ayaṃ carati ya itthaṃ svāṃ duhitaramasmākaṃ svasāraṃ karoti vidhyemamiti taṃ rudro'bhyāyatya vivyādha tasya sāmi retaḥ pracaskanda tathennūnaṃ tadāsa -

1.7-3.1.7.4.4

tasmādetadṛṣiṇābhyanūktam / pitā yatsvāṃ duhitaramadhiṣkan kṣmayā retaḥ saṃjagmāno niṣiñcaditi tadāgnimārutamityukthaṃ tasmiṃstadvyākhyāyate yathā taddevā retaḥ prājanayaṃsteṣāṃ yadā devānāṃ krodho vyaidatha prajāpatimabhiṣajyaṃstasya taṃ śalyaṃ nirakṛntantsa vai yajña eva prajāpatiḥ -

1.7-3.1.7.4.5

te hocuḥ / upajānīta yathedaṃ nāmuyāsatkanīyo hāhuteryathedaṃ syāditi -

1.7-3.1.7.4.6

te hocuḥ / bhagāyainaddakṣiṇata āsīnāya pariharata tadbhagaḥ prāśiṣyati tadyathāhutamevaṃ bhaviṣyatīti tadbhagāya dakṣiṇata āsīnāya paryājahrustadbhago'vekṣāṃ cakre tasyākṣiṇī nirdadāha tathennūnaṃ tadāsa tasmādāhurandho bhaga iti -

1.7-3.1.7.4.7

te hocuḥ / no nvevātrāśamatpūṣṇa enatpariharateti tatpūṣṇe paryājahrustatpūṣā prāśa tasya dato nirjaghāna tathennūnaṃ tadāsa tasmādāhuradantakaḥ pūṣeti tasmādyampūṣṇe caruṃ kurvanti prapiṣṭānāmeva kurvanti yathādantakāyaivam -

1.7-3.1.7.4.8

te hocuḥ / no nvevātrāśamadbṛhaspataya enatpariharateti tadbṛhaspataye paryājahruḥ sa bṛhaspatiḥ savitārameva prasavāyopādhāvatsavitā vai devānāṃ prasavitedaṃ me prasuveti tadasmai savitā prasavitā prāsuvattadenaṃ savitṛprasūtaṃ nāhinattato'rvācīnaṃ śāntaṃ tadetannidānena yatprāśitram -

1.7-3.1.7.4.9

sa yatprāśitramavadyati / yadevātrāviddhaṃ yajñasya yadrudriyaṃ tadevaitannirmimīte'thāpa upaspṛśati śāntirāpastadadbhiḥ śamayatyatheḍāmpaśūntsamavadyati -

1.7-3.1.7.4.10

iḍākarma
atheḍāṃ paśūn samavadyati/ - १.७.४.(९)
sa vai yāvanmātramivaivāvadyet / tathā śalyaḥ pracyavate tasmādyāvanmātramivaivāvadyedanyatarata ājyaṃ kuryādadhastādvopariṣṭādvā tathā khadanniḥsaraṇavadbhavati tathā nisravati tasmādanyatarata ājyaṃ kuryādadhastādvopariṣṭādvā -

1.7-3.1.7.4.11

sa ājyasyopastīrya / dvirhaviṣo'vadāyāthopariṣṭādājyasyābhighārayati tadyathaiva yajñasyāvadānamevametat -

1.7-3.1.7.4.12

tanna pūrveṇa pariharet / pūrveṇa haike pariharanti purastādvai pratyañco yajamānampaśava upatiṣṭhante rudriyeṇa ha paśūnprasajedyatpūrveṇa pariharette'sya gṛhāḥ paśava upamūryamāṇā īyustasmādityeva tiryakprajihīta tathā ha rudriyeṇa paśūnna prasajati tiryagevainaṃ nirmimīte -

1.7-3.1.7.4.13

tatpratigṛhṇāti / devasya tvā savituḥ prasave'śvinorbāhubhyāṃ pūṣṇo hastābhyām pratigṛhṇāmīti -

1.7-3.1.7.4.14

tadyathaivādo bṛhaspatiḥ savitāram / prasavāyopādhāvatsavitā vai devānāmprasavitedaṃ me prasuveti tadasmai savitā prasavitā prāsuvattadenaṃ savitṛprasūtaṃ nāhinadevamevaiṣa etatsavitārameva prasavāyopadhāvati savitā vai devānāmprasavitedaṃ me prasuveti tadasmai savitā prasavitā prasauti tadenaṃ savitṛprasūtaṃ na hinasti -

1.7-3.1.7.4.15

tatprāśnāti / agneṣṭvāsyena prāśnāmīti na vā agniṃ kiṃ cana hinasti tatho hainametanna hinasti -

1.7-3.1.7.4.16

tanna dadbhiḥ khādet / nenma idaṃ rudriyaṃ dato hinasaditi tasmānna dadbhiḥ khādet -

1.7-3.1.7.4.17

athāpa ācāmati / śāntirāpastadadbhiḥ śāntyā śamayate'tha parikṣālya pātraṃ -

1.7-3.1.7.4.18

athāsmai brahmabhāgaṃ paryāharanti / brahmā vai yajñasya dakṣiṇata āste'bhigoptā sa etaṃ bhāgaṃ pratividāna āste yatprāśitraṃ tadasmai paryāhārṣustatprāśīdathayamasmai brahmabhāgaṃ paryāharanti tena bhāgī sa yadata ūrdhvamasaṃsthitaṃ yajñasya tadabhigopāyati tasmādvā asmai brahmabhāgaṃ paryāharanti -

1.7-3.1.7.4.19

sa vai vācaṃyama eva syāt / brahmanprasthāsyāmītyaitasmādvacaso vivṛhanti vā ete yajñaṃ kṣaṇvanti ye madhye yajñasya pākayajñiyayeḍayā caranti brahmā vā ṛtvijāmbhiṣaktamastadbrahmā saṃdadhāti na ha saṃdadhyādyadvāvadyamāna āsīta tasmādvācaṃyama eva syāt-

1.7-3.1.7.4.20

sa yadi purā mānuṣīṃ vācaṃ vyāharet / tatro vaiṣṇavīmṛcaṃ vā yajurvā japedyajño vai viṣṇustadyajñaṃ punarārabhate tasyo haiṣā prāyaścittiḥ -

1.7-3.1.7.4.21

sa yatrāha brahmanprasthāsyāmīti tadbrahmā japatyetaṃ te devā savitaryajñamprāhuriti tatsavitāraṃ prasavāyopadhāvati sa hi devānāṃ prasavitā bṛhaspataye brahmaṇa iti bṛhaspatirvai devānāṃ brahmā tadya eva devānāṃ brahmā tasmā evaitatprāha tasmādāha bṛhaspataye brahmaṇa iti tena yajñamava tena yajñapatiṃ tena māmaveti nātra tirohitamivāsti -

1.7-3.1.7.4.22

mano jūtirjuṣatāmājyasyeti / manasā vā idaṃ sarvamāptaṃ tanmanasaivaitatsarvāmāpnoti bṛhaspatiryajñamimaṃ tanotvariṣṭaṃ yajñaṃ samimaṃ dadhātviti yadvivṛḍhaṃ tatsaṃdadhāti viśve devāsa iha mādayantāmiti sarvaṃ vai viśve devāḥ sarveṇaivaitatsaṃdadhāti sa yadi kāmayeta brūyātpratiṣṭheti yadyu kāmayetāpi nādriyeta -

Original text: śatapathabrāhmaṇam · Sanskrit Wikisource contributors · Sanskrit Wikisource · CC BY-SA 4.0