Shatapatha Brahmana · Chapter 1.3.5

१.३.५ sāmidhenyanuvacanam
indhe ha vā etadadhvaryuḥ / idhmenāgniṃ tasmādidhmo nāma samindhe sāmidhenībhirhotā tasmātsāmidhenyo nāma - १.३.५.
sa āha / agnaye samidhyamānāyānubrūhītyagnaye hyetatsamidhyamānāyānvāha - १.३.५.
tadu haika āhuḥ / agnaye samidhyamānāya hotaranubrūhīti tadu tathā na brūyādahotā vā eṣa purā bhavati yadaivainaṃ pravṛṇīte'tha hotā tasmādu brūyādagnaye samidhyamānāyānubrūhītyeva - १.३.५.
āgneyīranvāha / svayaivainametāddevatāyā samindhe gāyatrīranvāha gāyatraṃ vā agneśchandaḥ svenaivainametacchandasā samindhe vīryaṃ gāyatrī brahma gāyatrī vīryeṇaivainametatsamindhe - १.३.५.
ekādaśānvāha / ekādaśākṣarā vai triṣṭubbrahma gāyatrī kṣatraṃ triṣṭubetābhyāmevainametadubhābhyāṃ vīryābhyāṃ samindhe tasmādekādaśānvāha - १.३.५.
sa vai triḥ prathamāmanvāha / triruttamāṃ trivṛtprāyaṇā hi yajñāstrivṛdudayanāstasmāttriḥ prathamāmanvāha triruttamāṃ - १.३.५.
tāḥ pañcadaśa sāmidhenyaḥ saṃpadyante pañcadaśo vai vajro vīryaṃ vajro vīryamevaitatsāmidhenīrabhisaṃpādayati tasmādetāsvanūcyamānāsu yaṃ dviṣyāttamaṅguṣṭhābhyāmavabādhetedamahamamumavabādha iti tadenametena vajreṇāvabādhate - १.३.५.
pañcadaśa vā ardhamāsasya rātrayaḥ / ardhamāsaśo vai saṃvatsaro bhavanneti tadrātrīrāpnoti - १.३.५.
pañcadaśānāmu vai gāyatrīṇām / trīṇi ca śatāni ṣaṣṭiścākṣarāṇi trīṇi ca vai śatāni
ṣaṣṭiśca saṃvatsarasyāhāni tadahānyāpnoti tadveva saṃvatsaramāpnoti - १.३.५.
saptadaśa sāmidhenīḥ / iṣṭyā anubrūyādupāṃśu tasyai devatāyai yajati yasyā iṣṭiṃ nirvapati dvādaśa vai māsāḥ saṃvatsarasya pañcartava eṣa eva prajāpatiḥ saptadaśaḥ sarvaṃ vai prajāpatistatsarveṇaiva taṃ kāmamanaparādhaṃ rādhnoti yasmai kāmāyeṣṭiṃ nirvapatyupāṃśu devatāṃ yajatyaniruktaṃ vā upāṃśu sarvaṃ vā aniruktaṃ tatsarveṇaiva taṃ kāmamanaparādhaṃ rādhnoti yasmai kāmāyeṣṭiṃ nirvapatyeṣa iṣṭerupacāraḥ - १.३.५.
ekaviṃśatiṃ sāmidhenīḥ / api darśapūrṇamāsayoranubrūyādityāhurdvādaśa vai māsāḥ saṃvatsarasya pañcartavastrayo lokāstadviṃśatireṣa evaikaviṃśo ya eṣa tapati saiṣā gatireṣā pratiṣṭhā tadetāṃ gatimetāṃ pratiṣṭhāṃ gacchati tasmādekaviṃśatimanubrūyāt - १.३.५.
tā haitā gataśrerevānubrūyāt / ya icchenna śreyāntsyānna pāpīyāniti yādṛśāya haiva sate'nvāhustādṛṅvā haiva bhavati pāpīyānvā yasyaivaṃ viduṣa etā anvāhuḥ so eṣā mīmāṃsaiva na tvevaitā anūcyante - १.३.५.
trireva prathamāṃ triruttamāmanavānannanubrūyāt / trayo vā ime lokāstadimānevaitallokāntsantanotīmāṃllokāntspṛṇute traya ime puruṣe prāṇā etamevāsminnetatsaṃtatamavyavacchinnaṃ dadhātyetadanuvacanam - १.३.५.
sa yāvadasya vacaḥ syāt / evamevānuvivakṣettasyaitasya paricakṣīta sāmyavānyādanavānannanuvivakṣaṃstatkarma vivṛhyeta sā paricakṣā - १.३.५.
sa yadyetannodāśaṃseta /apyekaikāmevānavānannanubrūyāt tadekaikayaivemāṃllokāṃtsaṃtanotyekaikayemāṃllokāntspṛṇute'tha yatprāṇaṃ dadhāti gāyatrī vai prāṇaḥ sa yatkṛtsnāṃ gāyatrīmanvāha tatkṛtsnaṃ prāṇaṃ dadhāti tasmādekaikāmevānavānannanubrūyāt - १.३.५.
tā vai saṃtatā avyavacchinnā anvāha / saṃvatsarasyaivaitadahorātrāṇi saṃtanoti tānīmāni
saṃvatsarasyāhorātrāṇi saṃtatānyavyavacchinnāni pariplavante dviṣata u caivaitadbhrātṛvyāya nopasthānaṃ karotyupasthānaṃ ha kuryādyadasaṃtatā anubrūyāttasmādvai saṃtatā avyavacchinnā anvāha - १.३.५.