Scripture Library

Shatapatha Brahmana · Chapter 1.2.3

1.2.3.1.2.3.1

caturdhāvihito ha vā agre'gnirāsa / sa yamagre'gniṃ hotrāya prāvṛṇata sa prādhanvadyaṃ dvitīyaṃ prāvṛṇata sa praivādhanvadyaṃ tṛtīyaṃ prāvṛṇata sa praivādhanvadatha yo'yametarhyagniḥ sa bhīṣā nililye so'paḥ praviveśa taṃ devā anuvidya sahasaivādbhya āninyuḥ so'po'bhitiṣṭhevāvaṣṭhyūtā stha yā aprapadanaṃ stha yābhyo vo māmakāmaṃ nayantīti tata āptyāḥ sambabhūvustrito dvita ekataḥ -

1.2.3.1.2.3.2

ta indreṇa saha ceruḥ / yathedaṃ brāhmaṇo rājānamanucarati sa yatra triśīrṣāṇaṃ tvāṣṭraṃ viśvarūpaṃ jaghāna tasya haite'pi vadhyasya vidāñcakruḥ śaśvaddhainaṃ trita eva jaghānātyaha tadindro'mucyata devo hi saḥ -

1.2.3.1.2.3.3

ta u haita ūcuḥ / upaivema eno gacchantu ye'sya vadhyasyāvediṣuriti kimiti yajña evaiṣu mṛṣṭāmiti tadeṣvetadyajño mṛṣṭe yadebhyaḥ pātrīnirṇejanamaṅgulipraṇejanaṃ ninayanti -

1.2.3.1.2.3.4

ta u hāptyā ūcuḥ / atyeva vayamidamasmatparo nayāmeti kamabhīti ya evādakṣiṇena haviṣā yajātā'iti tasmānnādakṣiṇena haviṣā yajetāptyeṣu ha yajño mṛṣṭa āptyā u ha tasminmṛjate yo'dakṣiṇena haviṣā yajate -

1.2.3.1.2.3.5

tato devāḥ / etāṃ darśapūrṇamāsayordakṣiṇāmakalpanyadanvāhāryaṃ nedadakṣiṇaṃ havirasaditi tannānā ninayati tathaibhyo'samadaṃ karoti tadabhitapati tathaiṣāṃ śṛtaṃ bhavati sa ninayati tritāya tvā dvitāya tvaikatāya tveti paśurha vā eṣa ālabhyate yatpuroḍāśaḥ -

1.2.3.1.2.3.6

puruṣaṃ ha vai devāḥ / agre paśumālebhire tasyālabdhasya medho'pacakrāma so'śvaṃ praviveśa te'śvamālabhanta tasyālabdhasya medho'pacakrāma sa gāṃ praviveśa te gāmālabhanta/ tasyālabdhasya medho'pacakrāma/ so'viṃ praviveśa te'vimālabhanta/ tasyālabdhasya medho'pacakrāma/ so'jaṃ praviveśa te'jamālabhanta tasyālabdhasya medho'pacakrāma -

1.2.3.1.2.3.7

sa imaṃ pṛthivīṃ praviveśa / taṃ khanantaivānvīṣustamanvavindaṃstāvimau vrīhiyavau tasmādapyetāvetarhi khananta ivaivānuvindanti sa yāvadvīryavaddha vā asyaite sarve paśava ālabdhāḥ syustāvadvīryavaddhāsya havireva bhavati ya evametadvedātro sā sampadyadāhuḥ pāṅktaḥ paśuriti -

1.2.3.1.2.3.8

yadā piṣṭānyatha lomāni bhavanti / yadāpa ānayatyatha tvagbhavati yadā saṃyautyatha māṃsaṃ bhavati saṃtata iva hi sa tarhi bhavati saṃtatamiva hi māṃsaṃ yadā śṛto'thāsthi bhavati dāruṇa iva hi sa tarhi bhavati dāruṇamityasthyatha yadudvāsayiṣyannabhighārayati taṃ majjānaṃ dadhātyeṣo sā sampadyadāhuḥ pāṅktaḥ paśuriti -

1.2.3.1.2.3.9

sa yaṃ puruṣamālabhanta / sa kimpuruṣo'bhavadyāvaśvaṃ ca gāṃ ca tau gauraśca gavayaścābhavatāṃ yamavimālabhanta sa uṣṭro'bhavadyamajamālabhanta sa śarabho'bhavattasmādeteṣāṃ paśūnāṃ nāśitavyamapakrāntamedhā haite paśavaḥ -

Original text: śatapathabrāhmaṇam · Sanskrit Wikisource contributors · Sanskrit Wikisource · CC BY-SA 4.0