શતપથબ્રાહ્મણમ્ · અધ્યાય 1.2.3

ચતુર્ધાવિહિતો હ વા અગ્રેઽગ્નિરાસ । સ યમગ્રેઽગ્નિં હોત્રાય પ્રાવૃણત સ પ્રાધન્વદ્યં દ્વિતીયં પ્રાવૃણત સ પ્રૈવાધન્વદ્યં તૃતીયં પ્રાવૃણત સ પ્રૈવાધન્વદથ યોઽયમેતર્હ્યગ્નિઃ સ ભીષા નિલિલ્યે સોઽપઃ પ્રવિવેશ તં દેવા અનુવિદ્ય સહસૈવાદ્ભ્ય આનિન્યુઃ સોઽપોઽભિતિષ્ઠેવાવષ્ઠ્યૂતા સ્થ યા અપ્રપદનં સ્થ યાભ્યો વો મામકામં નયન્તીતિ તત આપ્ત્યાઃ સમ્બભૂવુસ્ત્રિતો દ્વિત એકતઃ -

ત ઇન્દ્રેણ સહ ચેરુઃ । યથેદં બ્રાહ્મણો રાજાનમનુચરતિ સ યત્ર ત્રિશીર્ષાણં ત્વાષ્ટ્રં વિશ્વરૂપં જઘાન તસ્ય હૈતેઽપિ વધ્યસ્ય વિદાઞ્ચક્રુઃ શશ્વદ્ધૈનં ત્રિત એવ જઘાનાત્યહ તદિન્દ્રોઽમુચ્યત દેવો હિ સઃ -

ત ઉ હૈત ઊચુઃ । ઉપૈવેમ એનો ગચ્છન્તુ યેઽસ્ય વધ્યસ્યાવેદિષુરિતિ કિમિતિ યજ્ઞ એવૈષુ મૃષ્ટામિતિ તદેષ્વેતદ્યજ્ઞો મૃષ્ટે યદેભ્યઃ પાત્રીનિર્ણેજનમઙ્ગુલિપ્રણેજનં નિનયન્તિ -

ત ઉ હાપ્ત્યા ઊચુઃ । અત્યેવ વયમિદમસ્મત્પરો નયામેતિ કમભીતિ ય એવાદક્ષિણેન હવિષા યજાતાઽઇતિ તસ્માન્નાદક્ષિણેન હવિષા યજેતાપ્ત્યેષુ હ યજ્ઞો મૃષ્ટ આપ્ત્યા ઉ હ તસ્મિન્મૃજતે યોઽદક્ષિણેન હવિષા યજતે -

તતો દેવાઃ । એતાં દર્શપૂર્ણમાસયોર્દક્ષિણામકલ્પન્યદન્વાહાર્યં નેદદક્ષિણં હવિરસદિતિ તન્નાના નિનયતિ તથૈભ્યોઽસમદં કરોતિ તદભિતપતિ તથૈષાં શૃતં ભવતિ સ નિનયતિ ત્રિતાય ત્વા દ્વિતાય ત્વૈકતાય ત્વેતિ પશુર્હ વા એષ આલભ્યતે યત્પુરોડાશઃ -

પુરુષં હ વૈ દેવાઃ । અગ્રે પશુમાલેભિરે તસ્યાલબ્ધસ્ય મેધોઽપચક્રામ સોઽશ્વં પ્રવિવેશ તેઽશ્વમાલભન્ત તસ્યાલબ્ધસ્ય મેધોઽપચક્રામ સ ગાં પ્રવિવેશ તે ગામાલભન્ત। તસ્યાલબ્ધસ્ય મેધોઽપચક્રામ। સોઽવિં પ્રવિવેશ તેઽવિમાલભન્ત। તસ્યાલબ્ધસ્ય મેધોઽપચક્રામ। સોઽજં પ્રવિવેશ તેઽજમાલભન્ત તસ્યાલબ્ધસ્ય મેધોઽપચક્રામ -

સ ઇમં પૃથિવીં પ્રવિવેશ । તં ખનન્તૈવાન્વીષુસ્તમન્વવિન્દંસ્તાવિમૌ વ્રીહિયવૌ તસ્માદપ્યેતાવેતર્હિ ખનન્ત ઇવૈવાનુવિન્દન્તિ સ યાવદ્વીર્યવદ્ધ વા અસ્યૈતે સર્વે પશવ આલબ્ધાઃ સ્યુસ્તાવદ્વીર્યવદ્ધાસ્ય હવિરેવ ભવતિ ય એવમેતદ્વેદાત્રો સા સમ્પદ્યદાહુઃ પાઙ્ક્તઃ પશુરિતિ -

યદા પિષ્ટાન્યથ લોમાનિ ભવન્તિ । યદાપ આનયત્યથ ત્વગ્ભવતિ યદા સંયૌત્યથ માંસં ભવતિ સંતત ઇવ હિ સ તર્હિ ભવતિ સંતતમિવ હિ માંસં યદા શૃતોઽથાસ્થિ ભવતિ દારુણ ઇવ હિ સ તર્હિ ભવતિ દારુણમિત્યસ્થ્યથ યદુદ્વાસયિષ્યન્નભિઘારયતિ તં મજ્જાનં દધાત્યેષો સા સમ્પદ્યદાહુઃ પાઙ્ક્તઃ પશુરિતિ -

સ યં પુરુષમાલભન્ત । સ કિમ્પુરુષોઽભવદ્યાવશ્વં ચ ગાં ચ તૌ ગૌરશ્ચ ગવયશ્ચાભવતાં યમવિમાલભન્ત સ ઉષ્ટ્રોઽભવદ્યમજમાલભન્ત સ શરભોઽભવત્તસ્માદેતેષાં પશૂનાં નાશિતવ્યમપક્રાન્તમેધા હૈતે પશવઃ -