Sārdhatriśatikālottarāgama · Chapter 16

ataḥ paraṃ pravakṣyāmi prāsādasya tu lakṣaṇam
hrasvaṃ dīrghaṃ plutaṃ caiva lakṣayenmantravitsadā //

hrasvo dahati pāpāni dīrgho mokṣaprado bhavet
āpyāyane plutaścaiva bindunā mūrdhni bhūṣitaḥ //

sthūlabhedāstrayaḥ proktā vaśyoccāṭanamāraṇe
plutena tu sadā vaśyaṃ kurute nātra saṃśayaḥ //

dīrghastūccāṭayetkṣipraṃ phaṭkāreṇa na saṃśayaḥ
ādāvante ca hrasvasya phaṭkāro māraṇe smṛtaḥ //

ādāvante ca hṛdaya yoga ākarṣaṇe smṛtaḥ
ākarṣayeddhruvaṃ yukto yojanānāṃ śate sthitam //

evamākarṣayetsādhyaṃ nāma vijñāya tattvataḥ
sādhakasya bhavedbahvī nyūnā sādhyasya kīrtitā //

evaṃ viditvā medhāvī ākarṣaṃ kurute dhruvam
avijñāya tvidaṃ samyaṅ naiva siddhyate sarvadā //

yāgaṃ kṛtvā tu pūrvoktaṃ mantrasyārghyaṃ ca dāpayet
arghyaṃ dattvā tu mantrasya japaṃ kuryādvicakṣaṇaḥ //

devasya dakṣiṇe bhāge pañcalakṣaṃ sthito japet
japānte ghṛtahomastu daśasāhasriko bhavet //

evamāpyāyito mantraḥ karmayogyo bhavettataḥ
uktānuktāni karmāṇi siddhiṃ yānti na saṃśayaḥ //

daśalakṣāṇi japato janāḥ svasthānavāsinaḥ
vaśamāyānti te kṣipram iti śāstrasya niścayaḥ //

tripañcalakṣaṃ japato daśagrāmanivāsinaḥ
te janā vaśamāyānti ātmanā ca dhanena ca //

evaṃ viṃśatibhirlakṣaiḥ prāsādasya ṣaḍānana
deśadeśādhipānmantrī niyataṃ vaśamānayet //

lakṣāṇāṃ pañcaviṃśatyā viṣayaṃ vaśamānayet
triṃśallakṣajapādasya vaśo vai maṇḍalī bhavet //

pañcatriṃśacca lakṣāṇi japanpṛthvīṃ vaśaṃ nayet
catvāriṃśajjapāddevam īkṣate hāṭakeśvaram //

lakṣāṇi japtvā pañcāśad vidyādharasamo bhavet
tatraiva modate mantrī yāvadābhūtasamplavam //