સાર્ધત્રિશતિકાલોત્તરાગમ · અધ્યાય 16

અતઃ પરં પ્રવક્ષ્યામિ પ્રાસાદસ્ય તુ લક્ષણમ્
હ્રસ્વં દીર્ઘં પ્લુતં ચૈવ લક્ષયેન્મન્ત્રવિત્સદા ॥

હ્રસ્વો દહતિ પાપાનિ દીર્ઘો મોક્ષપ્રદો ભવેત્
આપ્યાયને પ્લુતશ્ચૈવ બિન્દુના મૂર્ધ્નિ ભૂષિતઃ ॥

સ્થૂલભેદાસ્ત્રયઃ પ્રોક્તા વશ્યોચ્ચાટનમારણે
પ્લુતેન તુ સદા વશ્યં કુરુતે નાત્ર સંશયઃ ॥

દીર્ઘસ્તૂચ્ચાટયેત્ક્ષિપ્રં ફટ્કારેણ ન સંશયઃ
આદાવન્તે ચ હ્રસ્વસ્ય ફટ્કારો મારણે સ્મૃતઃ ॥

આદાવન્તે ચ હૃદય યોગ આકર્ષણે સ્મૃતઃ
આકર્ષયેદ્ધ્રુવં યુક્તો યોજનાનાં શતે સ્થિતમ્ ॥

એવમાકર્ષયેત્સાધ્યં નામ વિજ્ઞાય તત્ત્વતઃ
સાધકસ્ય ભવેદ્બહ્વી ન્યૂના સાધ્યસ્ય કીર્તિતા ॥

એવં વિદિત્વા મેધાવી આકર્ષં કુરુતે ધ્રુવમ્
અવિજ્ઞાય ત્વિદં સમ્યઙ્ નૈવ સિદ્ધ્યતે સર્વદા ॥

યાગં કૃત્વા તુ પૂર્વોક્તં મન્ત્રસ્યાર્ઘ્યં ચ દાપયેત્
અર્ઘ્યં દત્ત્વા તુ મન્ત્રસ્ય જપં કુર્યાદ્વિચક્ષણઃ ॥

દેવસ્ય દક્ષિણે ભાગે પઞ્ચલક્ષં સ્થિતો જપેત્
જપાન્તે ઘૃતહોમસ્તુ દશસાહસ્રિકો ભવેત્ ॥

એવમાપ્યાયિતો મન્ત્રઃ કર્મયોગ્યો ભવેત્તતઃ
ઉક્તાનુક્તાનિ કર્માણિ સિદ્ધિં યાન્તિ ન સંશયઃ ॥

દશલક્ષાણિ જપતો જનાઃ સ્વસ્થાનવાસિનઃ
વશમાયાન્તિ તે ક્ષિપ્રમ્ ઇતિ શાસ્ત્રસ્ય નિશ્ચયઃ ॥

ત્રિપઞ્ચલક્ષં જપતો દશગ્રામનિવાસિનઃ
તે જના વશમાયાન્તિ આત્મના ચ ધનેન ચ ॥

એવં વિંશતિભિર્લક્ષૈઃ પ્રાસાદસ્ય ષડાનન
દેશદેશાધિપાન્મન્ત્રી નિયતં વશમાનયેત્ ॥

લક્ષાણાં પઞ્ચવિંશત્યા વિષયં વશમાનયેત્
ત્રિંશલ્લક્ષજપાદસ્ય વશો વૈ મણ્ડલી ભવેત્ ॥

પઞ્ચત્રિંશચ્ચ લક્ષાણિ જપન્પૃથ્વીં વશં નયેત્
ચત્વારિંશજ્જપાદ્દેવમ્ ઈક્ષતે હાટકેશ્વરમ્ ॥

લક્ષાણિ જપ્ત્વા પઞ્ચાશદ્ વિદ્યાધરસમો ભવેત્
તત્રૈવ મોદતે મન્ત્રી યાવદાભૂતસમ્પ્લવમ્ ॥