Saṃvitsiddhi (another edition) · Verses 21-40

tathā surāsuranara brahmabrahmāṇḍakoṭayaḥ
kleśakarmavipākādyair aspṛṣṭasyākhileśituḥ //

jñānādiṣāṇguṇyanidher acintyavibhavasya tāḥ
viṣṇor vibhūtimahima samudradrapsavipraṣaḥ //

kaḥ khalv aṅgulibhaṅgena samudrān saptasaṅkhyayā
gaṇayan gaṇayed ūrmi phenabudbudavipruṣaḥ //

yathaika eva savitā na dvitīyo nabhaḥsthale
ityuktyā na hi sāvitrā niṣidhyante 'tra raśmayaḥ //

yathā pradhānasaṅkhyeya saṅkhyāyāṃ naiva gaṇyate
saṅkhyā pṛthaksatī tatra saṅkhyeyānyapadārthavat //

pādo 'sya viśvā bhūtāni tripādasyāmṛtaṃ divi
iti bruvan jagat sarvam itthambhāve nyaveśayat //

etāvān asya mahimā tato jyāyastaro hi saḥ
yatrānyan na vijānāti sa bhūmod aram antaram
kurute 'sya bhayaṃ vyaktam ityādiśrutayaḥ parāḥ //

meror ivāṇur yasyedaṃ brahmāṇḍam akhilaṃ jagat
ityādikāḥ samastasya taditthambhāvatāparāḥ //

vācārambhaṇamātraṃ tu jagat sthāvarajaṅgamam
vikārajātaṃ, kūṭasthaṃ mūlakāraṇam eva sat //

ananyat kāraṇāt kāryaṃ pāvakād visphuliṅgavat
mṛttikālohabījādi nānādṛṣṭāntavistaraiḥ //

nāśakad dagdham analas tṛṇaṃ majjayituṃ jalam
na vāyuś calituṃ śaktaḥ tacchaktyāpy āyanād ṛte //

ekapradhānavijñānād vijñātam akhilaṃ bhavet
ityādivedavacana tanmūlāptāgamair api //

brahmātmanātmalābho 'yaṃ prapañcaś cidacinmayaḥ
iti pramīyate brāmhī vibhūtir na niṣidhyate //

tanniṣedhe samasta tasya mithyātvāl lokavedayoḥ
vyavahārās tu lupyeran tathā syād brahmadhīr api //

vyāvahārikasatyatvān mṛṣātve 'py aviruddhatā
pratyakṣāder iti mataṃ prāg eva samadūduṣam //

ataś copaniṣañjāta brahmādvaitadhiyā jagat
na bādhyate vibhūtitvād brahmaṇaś cetyavasthitam //

nanu sattve prapañcasya nāstīti pratyayaḥ katham
asattve vā kathaṃ tasminn astīti pratyayo bhavet //

sadasattvaṃ tathaikasya viruddhatvād asambhavi
sadasatpratyayaprāpta viruddhadvandvasaṅgame //

tayor anyatarārthasya niścayābhāvahetutaḥ
sadasattvaṃ prapañcasya jainās tu pratipedire //

sattvaprāptiṃ puraskṛtya nāstīti pratyayodayāt
sadā sattvaṃ prapañcasya sāṅkhyās tu pratipādire //