સંવિત્સિદ્ધિ (અન્ય આવૃત્તિ) · શ્લોક 21-40

તથા સુરાસુરનર બ્રહ્મબ્રહ્માણ્ડકોટયઃ
ક્લેશકર્મવિપાકાદ્યૈર્ અસ્પૃષ્ટસ્યાખિલેશિતુઃ ॥

જ્ઞાનાદિષાણ્ગુણ્યનિધેર્ અચિન્ત્યવિભવસ્ય તાઃ
વિષ્ણોર્ વિભૂતિમહિમ સમુદ્રદ્રપ્સવિપ્રષઃ ॥

કઃ ખલ્વ્ અઙ્ગુલિભઙ્ગેન સમુદ્રાન્ સપ્તસઙ્ખ્યયા
ગણયન્ ગણયેદ્ ઊર્મિ ફેનબુદ્બુદવિપ્રુષઃ ॥

યથૈક એવ સવિતા ન દ્વિતીયો નભઃસ્થલે
ઇત્યુક્ત્યા ન હિ સાવિત્રા નિષિધ્યન્તે ઽત્ર રશ્મયઃ ॥

યથા પ્રધાનસઙ્ખ્યેય સઙ્ખ્યાયાં નૈવ ગણ્યતે
સઙ્ખ્યા પૃથક્સતી તત્ર સઙ્ખ્યેયાન્યપદાર્થવત્ ॥

પાદો ઽસ્ય વિશ્વા ભૂતાનિ ત્રિપાદસ્યામૃતં દિવિ
ઇતિ બ્રુવન્ જગત્ સર્વમ્ ઇત્થમ્ભાવે ન્યવેશયત્ ॥

એતાવાન્ અસ્ય મહિમા તતો જ્યાયસ્તરો હિ સઃ
યત્રાન્યન્ ન વિજાનાતિ સ ભૂમોદ્ અરમ્ અન્તરમ્
કુરુતે ઽસ્ય ભયં વ્યક્તમ્ ઇત્યાદિશ્રુતયઃ પરાઃ ॥

મેરોર્ ઇવાણુર્ યસ્યેદં બ્રહ્માણ્ડમ્ અખિલં જગત્
ઇત્યાદિકાઃ સમસ્તસ્ય તદિત્થમ્ભાવતાપરાઃ ॥

વાચારમ્ભણમાત્રં તુ જગત્ સ્થાવરજઙ્ગમમ્
વિકારજાતં, કૂટસ્થં મૂલકારણમ્ એવ સત્ ॥

અનન્યત્ કારણાત્ કાર્યં પાવકાદ્ વિસ્ફુલિઙ્ગવત્
મૃત્તિકાલોહબીજાદિ નાનાદૃષ્ટાન્તવિસ્તરૈઃ ॥

નાશકદ્ દગ્ધમ્ અનલસ્ તૃણં મજ્જયિતું જલમ્
ન વાયુશ્ ચલિતું શક્તઃ તચ્છક્ત્યાપ્ય્ આયનાદ્ ઋતે ॥

એકપ્રધાનવિજ્ઞાનાદ્ વિજ્ઞાતમ્ અખિલં ભવેત્
ઇત્યાદિવેદવચન તન્મૂલાપ્તાગમૈર્ અપિ ॥

બ્રહ્માત્મનાત્મલાભો ઽયં પ્રપઞ્ચશ્ ચિદચિન્મયઃ
ઇતિ પ્રમીયતે બ્રામ્હી વિભૂતિર્ ન નિષિધ્યતે ॥

તન્નિષેધે સમસ્ત તસ્ય મિથ્યાત્વાલ્ લોકવેદયોઃ
વ્યવહારાસ્ તુ લુપ્યેરન્ તથા સ્યાદ્ બ્રહ્મધીર્ અપિ ॥

વ્યાવહારિકસત્યત્વાન્ મૃષાત્વે ઽપ્ય્ અવિરુદ્ધતા
પ્રત્યક્ષાદેર્ ઇતિ મતં પ્રાગ્ એવ સમદૂદુષમ્ ॥

અતશ્ ચોપનિષઞ્જાત બ્રહ્માદ્વૈતધિયા જગત્
ન બાધ્યતે વિભૂતિત્વાદ્ બ્રહ્મણશ્ ચેત્યવસ્થિતમ્ ॥

નનુ સત્ત્વે પ્રપઞ્ચસ્ય નાસ્તીતિ પ્રત્યયઃ કથમ્
અસત્ત્વે વા કથં તસ્મિન્ન્ અસ્તીતિ પ્રત્યયો ભવેત્ ॥

સદસત્ત્વં તથૈકસ્ય વિરુદ્ધત્વાદ્ અસમ્ભવિ
સદસત્પ્રત્યયપ્રાપ્ત વિરુદ્ધદ્વન્દ્વસઙ્ગમે ॥

તયોર્ અન્યતરાર્થસ્ય નિશ્ચયાભાવહેતુતઃ
સદસત્ત્વં પ્રપઞ્ચસ્ય જૈનાસ્ તુ પ્રતિપેદિરે ॥

સત્ત્વપ્રાપ્તિં પુરસ્કૃત્ય નાસ્તીતિ પ્રત્યયોદયાત્
સદા સત્ત્વં પ્રપઞ્ચસ્ય સાઙ્ખ્યાસ્ તુ પ્રતિપાદિરે ॥