Samavidhana Brahmana · Chapter p2

2.1 atha dvitīyaḥ prapāṭhakaḥ
athātaḥ kāmyānām

anādeśe trirātramupavāsaḥ puṣyeṇārambhaḥ

āyuṣyāṇyeva prathamam

abodhyagnirmmahitrīṇāmiti dve tvāvata indraꣳ naro grāme geyamāyuriti cāsya nidhanaṃ kuryyāt, tyamūṣu dve trātāramindraꣳ havirityetasya sthāne svasti na iti somaḥ punāntyaꣳ sasuprathamaṃ viśvato dāvanniti pūrvaṃ rahasya uduttamaṃ varuṇa pāśamityeṣo'riṣṭavarga eteṣāmekamanekaṃ vā sarvāṇi vā prayuñjānaḥ śatam̐ varṣāṇi jīvati / jarayaiva visraꣳsate

bhrājābhrāje śukracandre rājanarauhiṇake śukriyādye hāu svaratādīni catvāri setuṣāma caiṣaḥ pavitravarga eteṣāmekamanekaṃ vā sarvāṇi vā prayuñjānaḥ pūto bhavati

bahupratigṛhya yājayitvā vāsannamātmānaṃ manyamāno gauṣūktāśvasūkte śuddhāśuddhīye taratsamandītyetāni prayuñjānaḥ pūto bhavati

tavaśyāvīyaṃ prayuñjānaḥ śuciḥ pūto brahmalokamabhisampadyate na ca punarāvarttate

uduttamam̐ varuṇapāśamityetat sadā prayuñjānaḥ sambādhaṃ na nigacchati nigataśca pramucyate

gaurasarṣapāꣳ stuce tunāya tatsu na ityetena prāśnīyāddīrghāyurbhavati

trīnvodakāñjalīn sadācāmet pibā somamindra mandatu tvetyetābhyāṃ dīrghāyurbhavati dīrghāyurbhavati

iti prathamaḥ khaṇḍaḥ//२/१//
2.2 atha yasyā jātāni pramīyeran nyagrodhaśuṅgāꣳ śaramūlaṃ cotthāpya tadahastrivṛtaṃ kārayenmaṇimaggniṃ pratiṣṭhāpyāvṛtā hutvā maṇiṃ nidhāyābodhyaggnirityetenābhijuhuyāt / sahasrakṛtvaḥ śatāvaraṃ tṛtīye garbhamāsi nidadhyādājyaśeṣaṃ mekhalāyāṃ maṇiṃ dhārayet pumāꣳsaꣳ ha janayati jātasya kaṇṭhe'vasajet kumāramājyaśeṣaṃ prāśayet sarvāṇi srotāꣳsi tarpayedabhyañjītāharahastata ūrdhvamupayukte punaḥ prayogaḥ/ śatam̐ varṣāṇi jīvati jarayaiva visam̐sate

atha yo rakṣasā gṛhītaḥ syādaśanihatasya vṛkṣasyedhmaḥ, śuklāyā goḥ sarūpavatsāyā anyasyā vājyaṃ, bailvaṃ maṇimutthāpya tadahastrivṛtaṃ kārayenmaṇimagniṃ pratiṣṭhāpyāvṛtā hutvā maṇiṃ nidhāyendra tridhātu śaraṇamityetenābhijuhuyāt sahasrakṛtvaḥ śatāvaraṃ taṃ maṇiṃ kaṇṭhena śirasā vā dhārayan mucyate rakṣasā yadvā u viśpatiriti caitatsadā prayuñjīta svasti hāsya bhavati

āmayāvī kaumbhyaṃ ghṛtaṃ viśvāḥ pṛtanā abhibhūtaraṃ nara ityetenābhijuhuyāt sahasrakṛtvaḥ śatāvaraṃ jīveti cāsya nidhanaṃ kuryādetenaiva sadā prāśnīyānmucyate āmayāvyāno mitrā varuṇeti caitatsadā prayuñjīta svasti hāsya bhavati svasti hāsya bhavati

iti dvitīyaḥ khaṇḍaḥ //२/२//
2.3 atha yadasya rujecchanno devī rahasyena ghṛtamabhigīyābhyañjyācchāmyati ha

dvikādyena vodakaṃ pāyayecchītābhiradbhirabhiṣecayetsomaꣳ rājānaꣳ sanādaggne'ggniꣳ hotāramityetāni cainamabhiśrāvayecchāmyati ha

śaṅkhapuṣpīꣳ sarpasugandhāṃ cotthāpya tadahastrivṛtaṃ kārayenmaṇimaggniṃ pratiṣṭhāpyāvṛtā hutvā maṇiṃ nidhāya carṣaṇīdhṛtamiti vargeṇābhijuhuyāt sahasrakṛtvaḥ śatāvaraṃ taṃ maṇiṃ kaṇṭhena śirasā vā dhārayato na sarpabhayaṃ bhavati kayānāyāṃ ca sarpasāma sadā prayuñjīta svasti hāsya bhavati

śvetapuṣpāṃ bṛhatīmutthāpya tadahastrivṛtaṃ kārayenmaṇimaggniṃ pratiṣṭhāpyāvṛtā hutvā maṇiṃ nidhāya moṣu tvā vāghataśca na ityetenābhijuhuyāt sahasrakṛtvaḥ śatāvaraṃ taṃ maṇiṃ kaṇṭhena śirasā vā dhārayato na śastrabhayaṃ bhavati yata indra bhayāmaha iti caitatsadā prayuñjīta svasti hāsya bhavati

śvetapuṣpamarkkamutthāpya tadahastrivṛtaṃ kārayenmaṇimagniṃ pratiṣṭhāpyāvṛtā hutvā maṇiṃ nidhāya svāśirāmarkkeṇābhijuhuyāt sahasrakṛtvaḥ śatāvaraṃ taṃ maṇiṃ kaṇṭhena śirasā vā dhārayana bahvanno bhavati

dīrghatamaso'rko'rkkaśiro'rkagrīvā iti caitāni prayuñjānaḥ sarvatrānnaṃ labhate

samanyāyantī nidhanaṃ prayuñjāno na pipāsayā mriyate

iṣṭāhotrīyaṃ prayuñjāno nāpsu mriyate

acodasa iti tṛtīyaṃ prayuñjīta nainaṃ yakṣmā gṛhṇāti

tvamimā oṣadhīrityetatsadā prayuñjāno na gareṇa mriyate

saṃ te payām̐sīti pūrveṇa prathamaṃ grāsaṃ graseduttareṇa nigiredviṣamapyasyānnaṃ bhavati / nainaꣳ hiꣳsati nainaꣳ hiꣳsati

iti tṛtīyaḥ khaṇḍaḥ //२/३//
2.4 karavīradaṇḍamutthāpya devavratairabhijuhuyādanugānaśastena hastagatena yatra kva ca gacchati sarvatra hāsya svasti bhavati

tena nagaraṃ vā nigamam̐ vā grāmam̐ vā goṣṭhaṃ vā''gāraṃ vā manasā dhyāyanparilikhennātrāniṣṭhāḥ praviśanti

pratibhaye'dhvani devavratamādyaṃ gītvā madhyamamāvarttayet gate'dhvanyuttamaꣳ samāpayitvā viramet

udyataśastrān śatrūn dṛṣṭvā devavratāni dhyāyannainaꣳ hiꣳsanti

amānuṣe bhaye kayānāyāstṛtīyamāvarttayennainaꣳ hiꣳsanti

adhvānamabhyutthita āmandrairiti vargaṃ gītvā'napekṣamāṇo vrajet svastyarthacaritaḥ punaraiti nādhvani ca pramīyate

anyo vainamanugāyet kadācanastarīrasītyetena cainamabhiśrāvayedardhasāmni pradakṣiṇamāvarttayet samāpyānapekṣamāṇaḥ paro vrajeta svastyarthacaritaḥ punaraiti nādhvani ca pramīyate

eṣo uṣā apūrvyeti sam̐viśan sadā prayuñjītākālaꣳ svastyayanamudite yadadya kacca vṛtrahannityākālaꣳ svastyayanam

mūlaphalairupavasathaṃ kṛtvā māsamupavasedaraṇye nistāntavo muniryyā rauhiṇī vā pauṣī vā paurṇamāsī syāttadaharudyantamādityamupatiṣṭhetodvayaṃ tamasasparītyetena tata ūrdhvaṃ tadvratastadbhakṣaścatvāri varṣāṇi prayuñjāno jarāmṛtyū jahāti jarāmṛtyū jahāti

iti caturthaḥ khaṇḍaḥ //२/४//
2.5 athaikamanuṣyāṇāmāvarttanam̐ striyā vā pum̐so vā

śravaṇena vratamupetya pūrvaiḥ proṣṭhapadaiḥ

pāꣳsubhiḥ pratikṛtiṃ kṛtvā prākśirasaṃ pūrvāhṇe dakṣiṇaśirasaṃ madhyāhne pratyakśirasamaparāhṇe'rdharātra udakśirasaṃ tasyā hṛdayadeśamadhiṣṭhāyā yanta indra soma iti brāhmaṇasyedanta ekamiti kṣatriyasyaiṣa prakośa iti vaiśyasya vibhoṣṭa indra rādhasa iti śūdrasyodvayantamasasparīti vā sarveṣāꣳ sauvarṇī pratikṛtiṃ kuryyād brāhmaṇasya rājatīṃ kṣatriyasyaudumbarīṃ vaiśyasyāyasīꣳ śūdrasyaudumbarīṃ vā sarveṣāmayamasāviti prākśirasamaggnau pratiṣṭhāpyaudumbareṇa sruveṇājyenābhijuhuyācchāva itīnidhanena guṇī hāsya bhavati

kṛṣṇavrīhīṇāṃ nakhanirbhinnānāṃ piṣṭamayīṃ pratikṛtiṃ kṛtvā piṣṭasvedaꣳ svedayitvā sarṣapatailenābhyajya tasyāḥ kṣureṇāṅgānyavadāyāgnau juhuyāt pra mandina ityetena śeṣaꣳ svayaṃ prāśnīyāditarathābhāve mriyeta

atha yaḥ kāmayetā varttayeyamityekarātraṃ kṣurasam̐yuktastiṣṭhet sutāso madhumattamā iti vargameteṣāmekamanekam̐ vā sarvāṇi vā prayuñjāna ekarātreṇa kuṭumbinamāvarttayati

dvirātreṇa rājopajīvinaṃ trirātreṇa rājānaṃ catūrātreṇa grāmaṃ pañcarātreṇa nagaraꣳ ṣaḍrātreṇa janapadaꣳ saptarātreṇāsurarakṣāꣳsyaṣṭarātreṇa pitṛpiśācānnavarātreṇa yakṣān daśarātreṇa gandharvāpsaraso'rdhamāsena vaiśravaṇaṃ māsenendraṃ caturbhiḥ prajāpatiꣳ sam̐vatsareṇa yatkiñca jagatsarvaꣳ hāsya guṇī bhavati guṇī bhavati

iti pañcamaḥ khaṇḍaḥ //२/५//
2.6 athātaḥ saubhāgyānām

yadindro anayaduccā te jātamandhasa iti navamadaśame eteṣāmekamanekaṃ vā sarvāṇi vā prayuñjānaḥ subhago bhavati

dvandvādyāyāḥ saptamāṣṭamābhyāmindrāṇīꣳ sadā tarpayan subhago bhavati

apāmārgaṃ dantapavanaṃ ghṛtamadhuliptaṃ bhadro no aggnirāhuta ityetenāniṣṭhīvan sam̐vatsaraṃ bhakṣayan subhago bhavati

bhago na citra ityetābhyāmañjayan subhago bhavati

imamindreti vargaṃ prayuñjānaḥ sarvajanasya priyo bhavati

pari priyā divaḥ kavirityete yāṃ kāmayettām̐ śrāvayetkāmayate hainam

atha yāsya na guṇī syāttāṃ brūyādācāmetīndro viśvasya rājatītyetābhyāmācāmet

padapāꣳsūnvāsyāgnau juhuyādye te panthā adho diva iti

tailam̐ vainām̐ yācitvā pāṇī parimṛdvannagnau pratāpayedaggna āyāhi vītaya iti dvitīyena nānāgatāyām̐ viramet

gojarāyukamahastaspṛṣṭaꣳ śoṣayitvā priyaṅgukāꣳ sahāꣳ sahadevā madhyaṇḍāṃ bhūmipāśakāꣳ sacāṃ kācapuṣpīmityetā utthāpya tadahaścūrṇāni kārayedā no viśvāsu havyamityetena triḥ sampātāꣳścūrṇeṣu kṛtvā aggna āyāhi vītaya iti rahasyenādbhiḥ sam̐yūya tāni nāśuciḥ paśyedvopaspṛśedvā tadanulepanametenānulipto yām̐ yāmupaspṛśate sā sainaṃ kāmayate

gamyāṃ nāsnāta upaspṛśet

utpale buddhe priyaṅgukā āvapedyadā parṇāni sam̐haredathainamutthāpya caturaṅgulamubhayataḥ paricchidya madhyamuddharettadanulepanam, tenānulimpedavāꣳśaṃ ca ni tvā nakṣya viśpata ityetenāsya veśasthāḥ pravrajitāśca vaśyā bhavanti

kanyāpravahaṇa ekarātropoṣito'māvāsyāyāṃ niśi catuṣpatha ehyūṣu bravāṇi ta ityetenābhiṣiñcet trirabhiṣiktā pradīyate

ā te vatsāḥ iti puṃsaḥ

trirātropoṣitaḥ kṛṣṇacaturdaśyāꣳ śavādagāramāhṛtya catuṣpathe bādhakamidhmamupasamādhāya matsyaṃ kṛkaramityetau juhuyādaggne mṛḍa mahāꣳ asīti pūrveṇāggnirvṛtrāṇīti dvitīyāṃ/ te āhutī kośe kṛtvā haritālena gohṛdayaśoṇitena cottareṇa saṃnayedyaṃ dviṣyāt pramaꣳhiṣṭhīyenāsya śayyāmavakiredagāraṃ ca bhasmanā naikagrāme vasati

athāto yaśasyānāṃ tvamindra yaśā asi, pavate haryyato harirityeteṣāmekamanekaṃ vā sarvāṇi vā prayuñjāno yaśasvī bhavati

priyaṅgukā vā puṣyeṇābhijuhuyādyaśo meti tadanulepanam tenānulimpet saṃvatsaram/ yaśasvī bhavati yaśasvī bhavati

iti ṣaṣṭhaḥ khaṇḍaḥ //२/६//
2.7 athāto brahmavarcasyānām̐/ rathantaraṃ vāmadevyaṃ naudhasaꣳ śyaitaṃ mahānāmnyo yajñāyajñīyamityeteṣāmekamanekam̐ vā sarvāṇi vā prayuñjāno brahmavarcasī bhavati

kastamindreti dvikaṃ prayuñjāno brahmavarcasī bhavati śraddhā cāsya bhavati

jagṛhmā ta iti ṣaḍvargaṃ prayuñjāno brahmavarcasī bhavati

aṣṭarātropoṣito brāhmīmutthāpya prajāpaterhṛdayenābhigīya sahasrakṛtvaḥ prāśnīyācchrutanigādī bhavati

puṣpāṇi vāsyā udakena saṃvatsaraṃ yaṇvena prāśnīyācchrutanigādī bhavati

māsaꣳ somabhakṣaḥ syātsadasaspatimadbhutamityetena śrutanigādī bhavati

sadā vaitatprayuñjīta śrutanigādī bhavati

bhāradvājikāyā jihvāmutthāpya tadahaścūrṇaṃ kārayitvā madhusarpibhyāꣳ sam̐yūya prāgannaprāśanātkumāraṃ prāśayedindramidgāthino bṛhadityetena śrutanigādī bhavati

haridrāyāstulāvarārddhaṃ cūrṇayitvaitenaiva kalpena saṃvatsaraṃ yaṇvena prāśnīyācchrutanigādī bhavati

vacāmetena kalpena vācovratena pūrveṇa prāśnīyācchrutanigādī bhavati

matsyākṣaka śaṅkhapuṣpī vacā keraḍī ghṛtāni bārha dgireṇābhijuhuyātsahasrakṛtvaḥ śatāvarametenaiva prāśnīyācchrutanigādī bhavati

vacāyāstrivṛtaṃ kārayenmaṇimagniṃ pratiṣṭhāpyāvṛtā hutvā maṇiṃ nidhāya vācovratenottareṇābhijuhuyāt sahasrakṛtvaḥ śatāvarantaṃ maṇiṃ kaṇṭhena śirasā vā dhārayan kathāsu śreyān bhavati

vacāṃ madhukamityete āsye'vadhāyāpāṃ phenenetyetanmanasānudratyānte svāhākāreṇa nigīryya
rājanvānahamarājakastvamasītyuktvā vivadet parṣadi rājani cottaravādī bhavatyuttaravādī bhavati

iti saptamaḥ khaṇḍaḥ//२/७//
2.8 athātaḥ putrīyāṇām

ni tvā nakṣya, ni tvāmaggne, prayorāye'yamagniḥ suvīryyasya, jātaḥ pareṇa, na hi vaścaramañca na, somaḥ pavate janitā matīnāmiti sarvāṇyapatyaṃ nityavatsāḥ , rathantaraṃ, vyāhṛtivarggo'rūrucaditi dve eteṣāmekamanekaṃ vā sarvāṇi vā prayuñjānaḥ surūpān dīrghāyuṣaḥ putrām̐llabhate

rohiṇyām̐ vā rohiṇyā goḥ sarūpavatsāyāḥ payasi raktaśālīnāṃ sthālīpākaꣳ śrapayitvā parameṣṭhinaḥ prājāpatyasya vratenābhijuhuyāt sahasrakṛtvaḥ śatāvarametenaivābhigīyoddhṛtya sabhāryaḥ prāśnīyāt surūpān dīrghāyuṣaḥ putrām̐llabhate

kṛṣṇāyā gossarūpavatsāyāḥ payasi kṛṣṇaṣaṣṭikāṇāꣳ sthālīpākaꣳ śrapayitvā kṛṣṇapañcamyāmudite some tvamimā oṣadhīrityetenābhijuhuyāt sahasrakṛtvaḥ śatāvarametenaivābhigīyoddhṛtya sabhāryaḥ prāśnīyāt surūpān dīrghāyuṣaḥ putrām̐llabhate

kaumbhyaṃ ghṛtaṃ puruṣavratenābhijuhuyādanugānaśa uttareṇa sadā prāśnīyāt surūpān dīrghāyuṣaḥ putrām̐llabhate

uḍaṅgavānām̐ yo'gre gacchet taṃ gṛhītvā tadahastrivṛtaṃ kārayenmaṇimagniṃ pratiṣṭhāpyāvṛtā hutvā maṇiṃ nidhāyoccā te jātamandhasa iti tṛtīyenābhijuhuyāt sahasrakṛtvaḥ śatāvaraṃ taṃ maṇiṃ kaṇṭhena śirasā vā dhārayañcchatānucaro bhavati śatānucaro bhavati

ityaṣṭamaḥ khaṇḍaḥ//२/८//
iti dvitīyaḥ prapāṭhakaḥ