Rig Veda · Chapter 8.065

yad indra prāg apāg udaṅ nyag vā hūyase nṛbhiḥ |
ā yāhi tūyam āśubhiḥ ||

yad vā prasravaṇe divo mādayāse svarṇare |
yad vā samudre andhasaḥ ||

ā tvā gīrbhir mahām uruṁ huve gām iva bhojase |
indra somasya pītaye ||

ā ta indra mahimānaṁ harayo deva te mahaḥ |
rathe vahantu bibhrataḥ ||

indra gṛṇīṣa u stuṣe mahām̐ ugra īśānakṛt |
ehi naḥ sutam piba ||

sutāvantas tvā vayam prayasvanto havāmahe |
idaṁ no barhir āsade ||

yac cid dhi śaśvatām asīndra sādhāraṇas tvam |
taṁ tvā vayaṁ havāmahe ||

idaṁ te somyam madhv adhukṣann adribhir naraḥ |
juṣāṇa indra tat piba ||

viśvām̐ aryo vipaścito 'ti khyas tūyam ā gahi |
asme dhehi śravo bṛhat ||

dātā me pṛṣatīnāṁ rājā hiraṇyavīnām |
mā devā maghavā riṣat ||

sahasre pṛṣatīnām adhi ścandram bṛhat pṛthu |
śukraṁ hiraṇyam ā dade ||

napāto durgahasya me sahasreṇa surādhasaḥ |
śravo deveṣv akrata ||