Rig Veda · Chapter 8.064

ut tvā mandantu stomāḥ kṛṇuṣva rādho adrivaḥ |
ava brahmadviṣo jahi ||

padā paṇīm̐r arādhaso ni bādhasva mahām̐ asi |
nahi tvā kaś cana prati ||

tvam īśiṣe sutānām indra tvam asutānām |
tvaṁ rājā janānām ||

ehi prehi kṣayo divy ā3ghoṣañ carṣaṇīnām |
obhe pṛṇāsi rodasī ||

tyaṁ cit parvataṁ giriṁ śatavantaṁ sahasriṇam |
vi stotṛbhyo rurojitha ||

vayam u tvā divā sute vayaṁ naktaṁ havāmahe |
asmākaṁ kāmam ā pṛṇa ||

kva1 sya vṛṣabho yuvā tuvigrīvo anānataḥ |
brahmā kas taṁ saparyati ||

kasya svit savanaṁ vṛṣā jujuṣvām̐ ava gacchati |
indraṁ ka u svid ā cake ||

kaṁ te dānā asakṣata vṛtrahan kaṁ suvīryā |
ukthe ka u svid antamaḥ ||

ayaṁ te mānuṣe jane somaḥ pūruṣu sūyate |
tasyehi pra dravā piba ||

ayaṁ te śaryaṇāvati suṣomāyām adhi priyaḥ |
ārjīkīye madintamaḥ ||

tam adya rādhase mahe cārum madāya ghṛṣvaye |
ehīm indra dravā piba ||