ऋग्वेद · अध्याय 8.065

यद् इन्द्र प्राग् अपाग् उदङ् न्यग् वा हूयसे नृभिः ।
आ याहि तूयम् आशुभिः ॥

यद् वा प्रस्रवणे दिवो मादयासे स्वर्णरे ।
यद् वा समुद्रे अन्धसः ॥

आ त्वा गीर्भिर् महाम् उरुं हुवे गाम् इव भोजसे ।
इन्द्र सोमस्य पीतये ॥

आ त इन्द्र महिमानं हरयो देव ते महः ।
रथे वहन्तु बिभ्रतः ॥

इन्द्र गृणीष उ स्तुषे महाँ उग्र ईशानकृत् ।
एहि नः सुतम् पिब ॥

सुतावन्तस् त्वा वयम् प्रयस्वन्तो हवामहे ।
इदं नो बर्हिर् आसदे ॥

यच् चिद् धि शश्वताम् असीन्द्र साधारणस् त्वम् ।
तं त्वा वयं हवामहे ॥

इदं ते सोम्यम् मध्व् अधुक्षन्न् अद्रिभिर् नरः ।
जुषाण इन्द्र तत् पिब ॥

विश्वाँ अर्यो विपश्चितो ऽति ख्यस् तूयम् आ गहि ।
अस्मे धेहि श्रवो बृहत् ॥

दाता मे पृषतीनां राजा हिरण्यवीनाम् ।
मा देवा मघवा रिषत् ॥

सहस्रे पृषतीनाम् अधि श्चन्द्रम् बृहत् पृथु ।
शुक्रं हिरण्यम् आ ददे ॥

नपातो दुर्गहस्य मे सहस्रेण सुराधसः ।
श्रवो देवेष्व् अक्रत ॥