Rig Veda · Chapter 8.035

agninendreṇa varuṇena viṣṇunādityai rudrair vasubhiḥ sacābhuvā |
sajoṣasā uṣasā sūryeṇa ca somam pibatam aśvinā ||

viśvābhir dhībhir bhuvanena vājinā divā pṛthivyādribhiḥ sacābhuvā |
sajoṣasā uṣasā sūryeṇa ca somam pibatam aśvinā ||

viśvair devais tribhir ekādaśair ihādbhir marudbhir bhṛgubhiḥ sacābhuvā |
sajoṣasā uṣasā sūryeṇa ca somam pibatam aśvinā ||

juṣethāṁ yajñam bodhataṁ havasya me viśveha devau savanāva gacchatam |
sajoṣasā uṣasā sūryeṇa ceṣaṁ no voḻham aśvinā ||

stomaṁ juṣethāṁ yuvaśeva kanyanāṁ viśveha devau savanāva gacchatam |
sajoṣasā uṣasā sūryeṇa ceṣaṁ no voḻham aśvinā ||

giro juṣethām adhvaraṁ juṣethāṁ viśveha devau savanāva gacchatam |
sajoṣasā uṣasā sūryeṇa ceṣaṁ no voḻham aśvinā ||

hāridraveva patatho vaned upa somaṁ sutam mahiṣevāva gacchathaḥ |
sajoṣasā uṣasā sūryeṇa ca trir vartir yātam aśvinā ||

haṁsāv iva patatho adhvagāv iva somaṁ sutam mahiṣevāva gacchathaḥ |
sajoṣasā uṣasā sūryeṇa ca trir vartir yātam aśvinā ||

śyenāv iva patatho havyadātaye somaṁ sutam mahiṣevāva gacchathaḥ |
sajoṣasā uṣasā sūryeṇa ca trir vartir yātam aśvinā ||

pibataṁ ca tṛpṇutaṁ cā ca gacchatam prajāṁ ca dhattaṁ draviṇaṁ ca dhattam |
sajoṣasā uṣasā sūryeṇa corjaṁ no dhattam aśvinā ||

jayataṁ ca pra stutaṁ ca pra cāvatam prajāṁ ca dhattaṁ draviṇaṁ ca dhattam |
sajoṣasā uṣasā sūryeṇa corjaṁ no dhattam aśvinā ||

hataṁ ca śatrūn yatataṁ ca mitriṇaḥ prajāṁ ca dhattaṁ draviṇaṁ ca dhattam |
sajoṣasā uṣasā sūryeṇa corjaṁ no dhattam aśvinā ||

mitrāvaruṇavantā uta dharmavantā marutvantā jaritur gacchatho havam |
sajoṣasā uṣasā sūryeṇa cādityair yātam aśvinā ||

aṅgirasvantā uta viṣṇuvantā marutvantā jaritur gacchatho havam |
sajoṣasā uṣasā sūryeṇa cādityair yātam aśvinā ||

ṛbhumantā vṛṣaṇā vājavantā marutvantā jaritur gacchatho havam |
sajoṣasā uṣasā sūryeṇa cādityair yātam aśvinā ||

brahma jinvatam uta jinvataṁ dhiyo hataṁ rakṣāṁsi sedhatam amīvāḥ |
sajoṣasā uṣasā sūryeṇa ca somaṁ sunvato aśvinā ||

kṣatraṁ jinvatam uta jinvataṁ nṝn hataṁ rakṣāṁsi sedhatam amīvāḥ |
sajoṣasā uṣasā sūryeṇa ca somaṁ sunvato aśvinā ||

dhenūr jinvatam uta jinvataṁ viśo hataṁ rakṣāṁsi sedhatam amīvāḥ |
sajoṣasā uṣasā sūryeṇa ca somaṁ sunvato aśvinā ||

atrer iva śṛṇutam pūrvyastutiṁ śyāvāśvasya sunvato madacyutā |
sajoṣasā uṣasā sūryeṇa cāśvinā tiroahnyam ||

sargām̐ iva sṛjataṁ suṣṭutīr upa śyāvāśvasya sunvato madacyutā |
sajoṣasā uṣasā sūryeṇa cāśvinā tiroahnyam ||

raśmīm̐r iva yacchatam adhvarām̐ upa śyāvāśvasya sunvato madacyutā |
sajoṣasā uṣasā sūryeṇa cāśvinā tiroahnyam ||

arvāg rathaṁ ni yacchatam pibataṁ somyam madhu |
ā yātam aśvinā gatam avasyur vām ahaṁ huve dhattaṁ ratnāni dāśuṣe ||

namovāke prasthite adhvare narā vivakṣaṇasya pītaye |
ā yātam aśvinā gatam avasyur vām ahaṁ huve dhattaṁ ratnāni dāśuṣe ||

svāhākṛtasya tṛmpataṁ sutasya devāv andhasaḥ |
ā yātam aśvinā gatam avasyur vām ahaṁ huve dhattaṁ ratnāni dāśuṣe ||