Rig Veda · Chapter 8.036
avitāsi sunvato vṛktabarhiṣaḥ pibā somam madāya kaṁ śatakrato |
yaṁ te bhāgam adhārayan viśvāḥ sehānaḥ pṛtanā uru jrayaḥ sam apsujin marutvām̐ indra satpate ||
prāva stotāram maghavann ava tvām pibā somam madāya kaṁ śatakrato |
yaṁ te bhāgam adhārayan viśvāḥ sehānaḥ pṛtanā uru jrayaḥ sam apsujin marutvām̐ indra satpate ||
ūrjā devām̐ avasy ojasā tvām pibā somam madāya kaṁ śatakrato |
yaṁ te bhāgam adhārayan viśvāḥ sehānaḥ pṛtanā uru jrayaḥ sam apsujin marutvām̐ indra satpate ||
janitā divo janitā pṛthivyāḥ pibā somam madāya kaṁ śatakrato |
yaṁ te bhāgam adhārayan viśvāḥ sehānaḥ pṛtanā uru jrayaḥ sam apsujin marutvām̐ indra satpate ||
janitāśvānāṁ janitā gavām asi pibā somam madāya kaṁ śatakrato |
yaṁ te bhāgam adhārayan viśvāḥ sehānaḥ pṛtanā uru jrayaḥ sam apsujin marutvām̐ indra satpate ||
atrīṇāṁ stomam adrivo mahas kṛdhi pibā somam madāya kaṁ śatakrato |
yaṁ te bhāgam adhārayan viśvāḥ sehānaḥ pṛtanā uru jrayaḥ sam apsujin marutvām̐ indra satpate ||
śyāvāśvasya sunvatas tathā śṛṇu yathāśṛṇor atreḥ karmāṇi kṛṇvataḥ |
pra trasadasyum āvitha tvam eka in nṛṣāhya indra brahmāṇi vardhayan ||
Original text: Ṛgveda-Saṃhitā · Edition: Theodor Aufrecht Die Hymnen des Rigveda. Mandala I-VI Bonn Mareus Theodor Aufrecht Die Hymnen des Rigveda. Mandala VII-X Bonn Mareus · Data entry Barend A. Van Nooten Gary B. Holland · GRETIL (Göttingen) · CC BY-NC-SA 4.0