Rig Veda · Chapter 7.097

yajñe divo nṛṣadane pṛthivyā naro yatra devayavo madanti |
indrāya yatra savanāni sunve gaman madāya prathamaṁ vayaś ca ||

ā daivyā vṛṇīmahe 'vāṁsi bṛhaspatir no maha ā sakhāyaḥ |
yathā bhavema mīḻhuṣe anāgā yo no dātā parāvataḥ piteva ||

tam u jyeṣṭhaṁ namasā havirbhiḥ suśevam brahmaṇas patiṁ gṛṇīṣe |
indraṁ śloko mahi daivyaḥ siṣaktu yo brahmaṇo devakṛtasya rājā ||

sa ā no yoniṁ sadatu preṣṭho bṛhaspatir viśvavāro yo asti |
kāmo rāyaḥ suvīryasya taṁ dāt parṣan no ati saścato ariṣṭān ||

tam ā no arkam amṛtāya juṣṭam ime dhāsur amṛtāsaḥ purājāḥ |
śucikrandaṁ yajatam pastyānām bṛhaspatim anarvāṇaṁ huvema ||

taṁ śagmāso aruṣāso aśvā bṛhaspatiṁ sahavāho vahanti |
sahaś cid yasya nīlavat sadhasthaṁ nabho na rūpam aruṣaṁ vasānāḥ ||

sa hi śuciḥ śatapatraḥ sa śundhyur hiraṇyavāśīr iṣiraḥ svarṣāḥ |
bṛhaspatiḥ sa svāveśa ṛṣvaḥ purū sakhibhya āsutiṁ kariṣṭhaḥ ||

devī devasya rodasī janitrī bṛhaspatiṁ vāvṛdhatur mahitvā |
dakṣāyyāya dakṣatā sakhāyaḥ karad brahmaṇe sutarā sugādhā ||

iyaṁ vām brahmaṇas pate suvṛktir brahmendrāya vajriṇe akāri |
aviṣṭaṁ dhiyo jigṛtam puraṁdhīr jajastam aryo vanuṣām arātīḥ ||

bṛhaspate yuvam indraś ca vasvo divyasyeśāthe uta pārthivasya |
dhattaṁ rayiṁ stuvate kīraye cid yūyam pāta svastibhiḥ sadā naḥ ||