Rig Veda · Chapter 7.096

bṛhad u gāyiṣe vaco 'suryā nadīnām |
sarasvatīm in mahayā suvṛktibhiḥ stomair vasiṣṭha rodasī ||

ubhe yat te mahinā śubhre andhasī adhikṣiyanti pūravaḥ |
sā no bodhy avitrī marutsakhā coda rādho maghonām ||

bhadram id bhadrā kṛṇavat sarasvaty akavārī cetati vājinīvatī |
gṛṇānā jamadagnivat stuvānā ca vasiṣṭhavat ||

janīyanto nv agravaḥ putrīyantaḥ sudānavaḥ |
sarasvantaṁ havāmahe ||

ye te sarasva ūrmayo madhumanto ghṛtaścutaḥ |
tebhir no 'vitā bhava ||

pīpivāṁsaṁ sarasvataḥ stanaṁ yo viśvadarśataḥ |
bhakṣīmahi prajām iṣam ||