Rig Veda · Chapter 7.033

śvityañco mā dakṣiṇataskapardā dhiyaṁjinvāso abhi hi pramanduḥ |
uttiṣṭhan voce pari barhiṣo nṝn na me dūrād avitave vasiṣṭhāḥ ||

dūrād indram anayann ā sutena tiro vaiśantam ati pāntam ugram |
pāśadyumnasya vāyatasya somāt sutād indro 'vṛṇītā vasiṣṭhān ||

even nu kaṁ sindhum ebhis tatāreven nu kam bhedam ebhir jaghāna |
even nu kaṁ dāśarājñe sudāsam prāvad indro brahmaṇā vo vasiṣṭhāḥ ||

juṣṭī naro brahmaṇā vaḥ pitṝṇām akṣam avyayaṁ na kilā riṣātha |
yac chakvarīṣu bṛhatā raveṇendre śuṣmam adadhātā vasiṣṭhāḥ ||

ud dyām ivet tṛṣṇajo nāthitāso 'dīdhayur dāśarājñe vṛtāsaḥ |
vasiṣṭhasya stuvata indro aśrod uruṁ tṛtsubhyo akṛṇod u lokam ||

daṇḍā ived goajanāsa āsan paricchinnā bharatā arbhakāsaḥ |
abhavac ca puraetā vasiṣṭha ād it tṛtsūnāṁ viśo aprathanta ||

trayaḥ kṛṇvanti bhuvaneṣu retas tisraḥ prajā āryā jyotiragrāḥ |
trayo gharmāsa uṣasaṁ sacante sarvām̐ it tām̐ anu vidur vasiṣṭhāḥ ||

sūryasyeva vakṣatho jyotir eṣāṁ samudrasyeva mahimā gabhīraḥ |
vātasyeva prajavo nānyena stomo vasiṣṭhā anvetave vaḥ ||

ta in niṇyaṁ hṛdayasya praketaiḥ sahasravalśam abhi saṁ caranti |
yamena tatam paridhiṁ vayanto 'psarasa upa sedur vasiṣṭhāḥ ||

vidyuto jyotiḥ pari saṁjihānam mitrāvaruṇā yad apaśyatāṁ tvā |
tat te janmotaikaṁ vasiṣṭhāgastyo yat tvā viśa ājabhāra ||

utāsi maitrāvaruṇo vasiṣṭhorvaśyā brahman manaso 'dhi jātaḥ |
drapsaṁ skannam brahmaṇā daivyena viśve devāḥ puṣkare tvādadanta ||

sa praketa ubhayasya pravidvān sahasradāna uta vā sadānaḥ |
yamena tatam paridhiṁ vayiṣyann apsarasaḥ pari jajñe vasiṣṭhaḥ ||

satre ha jātāv iṣitā namobhiḥ kumbhe retaḥ siṣicatuḥ samānam |
tato ha māna ud iyāya madhyāt tato jātam ṛṣim āhur vasiṣṭham ||

ukthabhṛtaṁ sāmabhṛtam bibharti grāvāṇam bibhrat pra vadāty agre |
upainam ādhvaṁ sumanasyamānā ā vo gacchāti pratṛdo vasiṣṭhaḥ ||