Rig Veda · Chapter 7.032

mo ṣu tvā vāghataś canāre asman ni rīraman |
ārāttāc cit sadhamādaṁ na ā gahīha vā sann upa śrudhi ||

ime hi te brahmakṛtaḥ sute sacā madhau na makṣa āsate |
indre kāmaṁ jaritāro vasūyavo rathe na pādam ā dadhuḥ ||

rāyaskāmo vajrahastaṁ sudakṣiṇam putro na pitaraṁ huve ||

ima indrāya sunvire somāso dadhyāśiraḥ |
tām̐ ā madāya vajrahasta pītaye haribhyāṁ yāhy oka ā ||

śravac chrutkarṇa īyate vasūnāṁ nū cin no mardhiṣad giraḥ |
sadyaś cid yaḥ sahasrāṇi śatā dadan nakir ditsantam ā minat ||

sa vīro apratiṣkuta indreṇa śūśuve nṛbhiḥ |
yas te gabhīrā savanāni vṛtrahan sunoty ā ca dhāvati ||

bhavā varūtham maghavan maghonāṁ yat samajāsi śardhataḥ |
vi tvāhatasya vedanam bhajemahy ā dūṇāśo bharā gayam ||

sunotā somapāvne somam indrāya vajriṇe |
pacatā paktīr avase kṛṇudhvam it pṛṇann it pṛṇate mayaḥ ||

mā sredhata somino dakṣatā mahe kṛṇudhvaṁ rāya ātuje |
taraṇir ij jayati kṣeti puṣyati na devāsaḥ kavatnave ||

nakiḥ sudāso ratham pary āsa na rīramat |
indro yasyāvitā yasya maruto gamat sa gomati vraje ||

gamad vājaṁ vājayann indra martyo yasya tvam avitā bhuvaḥ |
asmākam bodhy avitā rathānām asmākaṁ śūra nṛṇām ||

ud in nv asya ricyate 'ṁśo dhanaṁ na jigyuṣaḥ |
ya indro harivān na dabhanti taṁ ripo dakṣaṁ dadhāti somini ||

mantram akharvaṁ sudhitaṁ supeśasaṁ dadhāta yajñiyeṣv ā |
pūrvīś cana prasitayas taranti taṁ ya indre karmaṇā bhuvat ||

kas tam indra tvāvasum ā martyo dadharṣati |
śraddhā it te maghavan pārye divi vājī vājaṁ siṣāsati ||

maghonaḥ sma vṛtrahatyeṣu codaya ye dadati priyā vasu |
tava praṇītī haryaśva sūribhir viśvā tarema duritā ||

taved indrāvamaṁ vasu tvam puṣyasi madhyamam |
satrā viśvasya paramasya rājasi nakiṣ ṭvā goṣu vṛṇvate ||

tvaṁ viśvasya dhanadā asi śruto ya īm bhavanty ājayaḥ |
tavāyaṁ viśvaḥ puruhūta pārthivo 'vasyur nāma bhikṣate ||

yad indra yāvatas tvam etāvad aham īśīya |
stotāram id didhiṣeya radāvaso na pāpatvāya rāsīya ||

śikṣeyam in mahayate dive-dive rāya ā kuhacidvide |
nahi tvad anyan maghavan na āpyaṁ vasyo asti pitā cana ||

taraṇir it siṣāsati vājam puraṁdhyā yujā |
ā va indram puruhūtaṁ name girā nemiṁ taṣṭeva sudrvam ||

na duṣṭutī martyo vindate vasu na sredhantaṁ rayir naśat |
suśaktir in maghavan tubhyam māvate deṣṇaṁ yat pārye divi ||

abhi tvā śūra nonumo 'dugdhā iva dhenavaḥ |
īśānam asya jagataḥ svardṛśam īśānam indra tasthuṣaḥ ||

na tvāvām̐ anyo divyo na pārthivo na jāto na janiṣyate |
aśvāyanto maghavann indra vājino gavyantas tvā havāmahe ||

abhī ṣatas tad ā bharendra jyāyaḥ kanīyasaḥ |
purūvasur hi maghavan sanād asi bhare-bhare ca havyaḥ ||

parā ṇudasva maghavann amitrān suvedā no vasū kṛdhi |
asmākam bodhy avitā mahādhane bhavā vṛdhaḥ sakhīnām ||

indra kratuṁ na ā bhara pitā putrebhyo yathā |
śikṣā ṇo asmin puruhūta yāmani jīvā jyotir aśīmahi ||

mā no ajñātā vṛjanā durādhyo3 māśivāso ava kramuḥ |
tvayā vayam pravataḥ śaśvatīr apo 'ti śūra tarāmasi ||