Rig Veda · Chapter 7.010
uṣo na jāraḥ pṛthu pājo aśred davidyutad dīdyac chośucānaḥ |
vṛṣā hariḥ śucir ā bhāti bhāsā dhiyo hinvāna uśatīr ajīgaḥ ||
sva1r ṇa vastor uṣasām aroci yajñaṁ tanvānā uśijo na manma |
agnir janmāni deva ā vi vidvān dravad dūto devayāvā vaniṣṭhaḥ ||
acchā giro matayo devayantīr agniṁ yanti draviṇam bhikṣamāṇāḥ |
susaṁdṛśaṁ supratīkaṁ svañcaṁ havyavāham aratim mānuṣāṇām ||
indraṁ no agne vasubhiḥ sajoṣā rudraṁ rudrebhir ā vahā bṛhantam |
ādityebhir aditiṁ viśvajanyām bṛhaspatim ṛkvabhir viśvavāram ||
mandraṁ hotāram uśijo yaviṣṭham agniṁ viśa īḻate adhvareṣu |
sa hi kṣapāvām̐ abhavad rayīṇām atandro dūto yajathāya devān ||
Original text: Ṛgveda-Saṃhitā · Edition: Theodor Aufrecht Die Hymnen des Rigveda. Mandala I-VI Bonn Mareus Theodor Aufrecht Die Hymnen des Rigveda. Mandala VII-X Bonn Mareus · Data entry Barend A. Van Nooten Gary B. Holland · GRETIL (Göttingen) · CC BY-NC-SA 4.0