Rig Veda · Chapter 7.009

abodhi jāra uṣasām upasthād dhotā mandraḥ kavitamaḥ pāvakaḥ |
dadhāti ketum ubhayasya jantor havyā deveṣu draviṇaṁ sukṛtsu ||

sa sukratur yo vi duraḥ paṇīnām punāno arkam purubhojasaṁ naḥ |
hotā mandro viśāṁ damūnās tiras tamo dadṛśe rāmyāṇām ||

amūraḥ kavir aditir vivasvān susaṁsan mitro atithiḥ śivo naḥ |
citrabhānur uṣasām bhāty agre 'pāṁ garbhaḥ prasva1 ā viveśa ||

īḻenyo vo manuṣo yugeṣu samanagā aśucaj jātavedāḥ |
susaṁdṛśā bhānunā yo vibhāti prati gāvaḥ samidhānam budhanta ||

agne yāhi dūtya1m mā riṣaṇyo devām̐ acchā brahmakṛtā gaṇena |
sarasvatīm maruto aśvināpo yakṣi devān ratnadheyāya viśvān ||

tvām agne samidhāno vasiṣṭho jarūthaṁ han yakṣi rāye puraṁdhim |
puruṇīthā jātavedo jarasva yūyam pāta svastibhiḥ sadā naḥ ||