Rig Veda · Chapter 7.002

juṣasva naḥ samidham agne adya śocā bṛhad yajataṁ dhūmam ṛṇvan |
upa spṛśa divyaṁ sānu stūpaiḥ saṁ raśmibhis tatanaḥ sūryasya ||

narāśaṁsasya mahimānam eṣām upa stoṣāma yajatasya yajñaiḥ |
ye sukratavaḥ śucayo dhiyaṁdhāḥ svadanti devā ubhayāni havyā ||

īḻenyaṁ vo asuraṁ sudakṣam antar dūtaṁ rodasī satyavācam |
manuṣvad agnim manunā samiddhaṁ sam adhvarāya sadam in mahema ||

saparyavo bharamāṇā abhijñu pra vṛñjate namasā barhir agnau |
ājuhvānā ghṛtapṛṣṭham pṛṣadvad adhvaryavo haviṣā marjayadhvam ||

svādhyo3 vi duro devayanto 'śiśrayū rathayur devatātā |
pūrvī śiśuṁ na mātarā rihāṇe sam agruvo na samaneṣv añjan ||

uta yoṣaṇe divye mahī na uṣāsānaktā sudugheva dhenuḥ |
barhiṣadā puruhūte maghonī ā yajñiye suvitāya śrayetām ||

viprā yajñeṣu mānuṣeṣu kārū manye vāṁ jātavedasā yajadhyai |
ūrdhvaṁ no adhvaraṁ kṛtaṁ haveṣu tā deveṣu vanatho vāryāṇi ||

ā bhāratī bhāratībhiḥ sajoṣā iḻā devair manuṣyebhir agniḥ |
sarasvatī sārasvatebhir arvāk tisro devīr barhir edaṁ sadantu ||

tan nas turīpam adha poṣayitnu deva tvaṣṭar vi rarāṇaḥ syasva |
yato vīraḥ karmaṇyaḥ sudakṣo yuktagrāvā jāyate devakāmaḥ ||

vanaspate 'va sṛjopa devān agnir haviḥ śamitā sūdayāti |
sed u hotā satyataro yajāti yathā devānāṁ janimāni veda ||

ā yāhy agne samidhāno arvāṅ indreṇa devaiḥ sarathaṁ turebhiḥ |
barhir na āstām aditiḥ suputrā svāhā devā amṛtā mādayantām ||