Rig Veda · Chapter 5.083

acchā vada tavasaṁ gīrbhir ābhiḥ stuhi parjanyaṁ namasā vivāsa |
kanikradad vṛṣabho jīradānū reto dadhāty oṣadhīṣu garbham ||

vi vṛkṣān hanty uta hanti rakṣaso viśvam bibhāya bhuvanam mahāvadhāt |
utānāgā īṣate vṛṣṇyāvato yat parjanyaḥ stanayan hanti duṣkṛtaḥ ||

rathīva kaśayāśvām̐ abhikṣipann āvir dūtān kṛṇute varṣyā3m̐ aha |
dūrāt siṁhasya stanathā ud īrate yat parjanyaḥ kṛṇute varṣya1ṁ nabhaḥ ||

pra vātā vānti patayanti vidyuta ud oṣadhīr jihate pinvate svaḥ |
irā viśvasmai bhuvanāya jāyate yat parjanyaḥ pṛthivīṁ retasāvati ||

yasya vrate pṛthivī nannamīti yasya vrate śaphavaj jarbhurīti |
yasya vrata oṣadhīr viśvarūpāḥ sa naḥ parjanya mahi śarma yaccha ||

divo no vṛṣṭim maruto rarīdhvam pra pinvata vṛṣṇo aśvasya dhārāḥ |
arvāṅ etena stanayitnunehy apo niṣiñcann asuraḥ pitā naḥ ||

abhi kranda stanaya garbham ā dhā udanvatā pari dīyā rathena |
dṛtiṁ su karṣa viṣitaṁ nyañcaṁ samā bhavantūdvato nipādāḥ ||

mahāntaṁ kośam ud acā ni ṣiñca syandantāṁ kulyā viṣitāḥ purastāt |
ghṛtena dyāvāpṛthivī vy undhi suprapāṇam bhavatv aghnyābhyaḥ ||

yat parjanya kanikradat stanayan haṁsi duṣkṛtaḥ |
pratīdaṁ viśvam modate yat kiṁ ca pṛthivyām adhi ||

avarṣīr varṣam ud u ṣū gṛbhāyākar dhanvāny atyetavā u |
ajījana oṣadhīr bhojanāya kam uta prajābhyo 'vido manīṣām ||