Rig Veda · Chapter 5.082

tat savitur vṛṇīmahe vayaṁ devasya bhojanam |
śreṣṭhaṁ sarvadhātamaṁ turam bhagasya dhīmahi ||

asya hi svayaśastaraṁ savituḥ kac cana priyam |
na minanti svarājyam ||

sa hi ratnāni dāśuṣe suvāti savitā bhagaḥ |
tam bhāgaṁ citram īmahe ||

adyā no deva savitaḥ prajāvat sāvīḥ saubhagam |
parā duṣṣvapnyaṁ suva ||

viśvāni deva savitar duritāni parā suva |
yad bhadraṁ tan na ā suva ||

anāgaso aditaye devasya savituḥ save |
viśvā vāmāni dhīmahi ||

ā viśvadevaṁ satpatiṁ sūktair adyā vṛṇīmahe |
satyasavaṁ savitāram ||

ya ime ubhe ahanī pura ety aprayucchan |
svādhīr devaḥ savitā ||

ya imā viśvā jātāny āśrāvayati ślokena |
pra ca suvāti savitā ||