Rig Veda · Chapter 5.079

mahe no adya bodhayoṣo rāye divitmatī |
yathā cin no abodhayaḥ satyaśravasi vāyye sujāte aśvasūnṛte ||

yā sunīthe śaucadrathe vy auccho duhitar divaḥ |
sā vy uccha sahīyasi satyaśravasi vāyye sujāte aśvasūnṛte ||

sā no adyābharadvasur vy ucchā duhitar divaḥ |
yo vy aucchaḥ sahīyasi satyaśravasi vāyye sujāte aśvasūnṛte ||

abhi ye tvā vibhāvari stomair gṛṇanti vahnayaḥ |
maghair maghoni suśriyo dāmanvantaḥ surātayaḥ sujāte aśvasūnṛte ||

yac cid dhi te gaṇā ime chadayanti maghattaye |
pari cid vaṣṭayo dadhur dadato rādho ahrayaṁ sujāte aśvasūnṛte ||

aiṣu dhā vīravad yaśa uṣo maghoni sūriṣu |
ye no rādhāṁsy ahrayā maghavāno arāsata sujāte aśvasūnṛte ||

tebhyo dyumnam bṛhad yaśa uṣo maghony ā vaha |
ye no rādhāṁsy aśvyā gavyā bhajanta sūrayaḥ sujāte aśvasūnṛte ||

uta no gomatīr iṣa ā vahā duhitar divaḥ |
sākaṁ sūryasya raśmibhiḥ śukraiḥ śocadbhir arcibhiḥ sujāte aśvasūnṛte ||

vy ucchā duhitar divo mā ciraṁ tanuthā apaḥ |
net tvā stenaṁ yathā ripuṁ tapāti sūro arciṣā sujāte aśvasūnṛte ||

etāvad ved uṣas tvam bhūyo vā dātum arhasi |
yā stotṛbhyo vibhāvary ucchantī na pramīyase sujāte aśvasūnṛte ||