ઋગ્વેદ · અધ્યાય 5.079

મહે નો અદ્ય બોધયોષો રાયે દિવિત્મતી ।
યથા ચિન્ નો અબોધયઃ સત્યશ્રવસિ વાય્યે સુજાતે અશ્વસૂનૃતે ॥

યા સુનીથે શૌચદ્રથે વ્ય્ ઔચ્છો દુહિતર્ દિવઃ ।
સા વ્ય્ ઉચ્છ સહીયસિ સત્યશ્રવસિ વાય્યે સુજાતે અશ્વસૂનૃતે ॥

સા નો અદ્યાભરદ્વસુર્ વ્ય્ ઉચ્છા દુહિતર્ દિવઃ ।
યો વ્ય્ ઔચ્છઃ સહીયસિ સત્યશ્રવસિ વાય્યે સુજાતે અશ્વસૂનૃતે ॥

અભિ યે ત્વા વિભાવરિ સ્તોમૈર્ ગૃણન્તિ વહ્નયઃ ।
મઘૈર્ મઘોનિ સુશ્રિયો દામન્વન્તઃ સુરાતયઃ સુજાતે અશ્વસૂનૃતે ॥

યચ્ ચિદ્ ધિ તે ગણા ઇમે છદયન્તિ મઘત્તયે ।
પરિ ચિદ્ વષ્ટયો દધુર્ દદતો રાધો અહ્રયં સુજાતે અશ્વસૂનૃતે ॥

ઐષુ ધા વીરવદ્ યશ ઉષો મઘોનિ સૂરિષુ ।
યે નો રાધાંસ્ય્ અહ્રયા મઘવાનો અરાસત સુજાતે અશ્વસૂનૃતે ॥

તેભ્યો દ્યુમ્નમ્ બૃહદ્ યશ ઉષો મઘોન્ય્ આ વહ ।
યે નો રાધાંસ્ય્ અશ્વ્યા ગવ્યા ભજન્ત સૂરયઃ સુજાતે અશ્વસૂનૃતે ॥

ઉત નો ગોમતીર્ ઇષ આ વહા દુહિતર્ દિવઃ ।
સાકં સૂર્યસ્ય રશ્મિભિઃ શુક્રૈઃ શોચદ્ભિર્ અર્ચિભિઃ સુજાતે અશ્વસૂનૃતે ॥

વ્ય્ ઉચ્છા દુહિતર્ દિવો મા ચિરં તનુથા અપઃ ।
નેત્ ત્વા સ્તેનં યથા રિપું તપાતિ સૂરો અર્ચિષા સુજાતે અશ્વસૂનૃતે ॥

એતાવદ્ વેદ્ ઉષસ્ ત્વમ્ ભૂયો વા દાતુમ્ અર્હસિ ।
યા સ્તોતૃભ્યો વિભાવર્ય્ ઉચ્છન્તી ન પ્રમીયસે સુજાતે અશ્વસૂનૃતે ॥