Rig Veda · Chapter 5.078

aśvināv eha gacchataṁ nāsatyā mā vi venatam |
haṁsāv iva patatam ā sutām̐ upa ||

aśvinā hariṇāv iva gaurāv ivānu yavasam |
haṁsāv iva patatam ā sutām̐ upa ||

aśvinā vājinīvasū juṣethāṁ yajñam iṣṭaye |
haṁsāv iva patatam ā sutām̐ upa ||

atrir yad vām avarohann ṛbīsam ajohavīn nādhamāneva yoṣā |
śyenasya cij javasā nūtanenāgacchatam aśvinā śaṁtamena ||

vi jihīṣva vanaspate yoniḥ sūṣyantyā iva |
śrutam me aśvinā havaṁ saptavadhriṁ ca muñcatam ||

bhītāya nādhamānāya ṛṣaye saptavadhraye |
māyābhir aśvinā yuvaṁ vṛkṣaṁ saṁ ca vi cācathaḥ ||

yathā vātaḥ puṣkariṇīṁ samiṅgayati sarvataḥ |
evā te garbha ejatu niraitu daśamāsyaḥ ||

yathā vāto yathā vanaṁ yathā samudra ejati |
evā tvaṁ daśamāsya sahāvehi jarāyuṇā ||

daśa māsāñ chaśayānaḥ kumāro adhi mātari |
niraitu jīvo akṣato jīvo jīvantyā adhi ||