Rig Veda · Chapter 5.075

prati priyatamaṁ rathaṁ vṛṣaṇaṁ vasuvāhanam |
stotā vām aśvināv ṛṣiḥ stomena prati bhūṣati mādhvī mama śrutaṁ havam ||

atyāyātam aśvinā tiro viśvā ahaṁ sanā |
dasrā hiraṇyavartanī suṣumnā sindhuvāhasā mādhvī mama śrutaṁ havam ||

ā no ratnāni bibhratāv aśvinā gacchataṁ yuvam |
rudrā hiraṇyavartanī juṣāṇā vājinīvasū mādhvī mama śrutaṁ havam ||

suṣṭubho vāṁ vṛṣaṇvasū rathe vāṇīcy āhitā |
uta vāṁ kakuho mṛgaḥ pṛkṣaḥ kṛṇoti vāpuṣo mādhvī mama śrutaṁ havam ||

bodhinmanasā rathyeṣirā havanaśrutā |
vibhiś cyavānam aśvinā ni yātho advayāvinam mādhvī mama śrutaṁ havam ||

ā vāṁ narā manoyujo 'śvāsaḥ pruṣitapsavaḥ |
vayo vahantu pītaye saha sumnebhir aśvinā mādhvī mama śrutaṁ havam ||

aśvināv eha gacchataṁ nāsatyā mā vi venatam |
tiraś cid aryayā pari vartir yātam adābhyā mādhvī mama śrutaṁ havam ||

asmin yajñe adābhyā jaritāraṁ śubhas patī |
avasyum aśvinā yuvaṁ gṛṇantam upa bhūṣatho mādhvī mama śrutaṁ havam ||

abhūd uṣā ruśatpaśur āgnir adhāyy ṛtviyaḥ |
ayoji vāṁ vṛṣaṇvasū ratho dasrāv amartyo mādhvī mama śrutaṁ havam ||