Rig Veda · Chapter 5.076

ā bhāty agnir uṣasām anīkam ud viprāṇāṁ devayā vāco asthuḥ |
arvāñcā nūnaṁ rathyeha yātam pīpivāṁsam aśvinā gharmam accha ||

na saṁskṛtam pra mimīto gamiṣṭhānti nūnam aśvinopastuteha |
divābhipitve 'vasāgamiṣṭhā praty avartiṁ dāśuṣe śambhaviṣṭhā ||

utā yātaṁ saṁgave prātar ahno madhyaṁdina uditā sūryasya |
divā naktam avasā śaṁtamena nedānīm pītir aśvinā tatāna ||

idaṁ hi vām pradivi sthānam oka ime gṛhā aśvinedaṁ duroṇam |
ā no divo bṛhataḥ parvatād ādbhyo yātam iṣam ūrjaṁ vahantā ||

sam aśvinor avasā nūtanena mayobhuvā supraṇītī gamema |
ā no rayiṁ vahatam ota vīrān ā viśvāny amṛtā saubhagāni ||