ઋગ્વેદ · અધ્યાય 5.054

પ્ર શર્ધાય મારુતાય સ્વભાનવ ઇમાં વાચમ્ અનજા પર્વતચ્યુતે ।
ઘર્મસ્તુભે દિવ આ પૃષ્ઠયજ્વને દ્યુમ્નશ્રવસે મહિ નૃમ્ણમ્ અર્ચત ॥

પ્ર વો મરુતસ્ તવિષા ઉદન્યવો વયોવૃધો અશ્વયુજઃ પરિજ્રયઃ ।
સં વિદ્યુતા દધતિ વાશતિ ત્રિતઃ સ્વરન્ત્ય્ આપો ઽવના પરિજ્રયઃ ॥

વિદ્યુન્મહસો નરો અશ્મદિદ્યવો વાતત્વિષો મરુતઃ પર્વતચ્યુતઃ ।
અબ્દયા ચિન્ મુહુર્ આ હ્રાદુનીવૃતઃ સ્તનયદમા રભસા ઉદોજસઃ ॥

વ્ય્ અ1ક્તૂન્ રુદ્રા વ્ય્ અહાનિ શિક્વસો વ્ય્ અ1ન્તરિક્ષં વિ રજાંસિ ધૂતયઃ ।
વિ યદ્ અજ્રાઁ અજથ નાવ ઈં યથા વિ દુર્ગાણિ મરુતો નાહ રિષ્યથ ॥

તદ્ વીર્યં વો મરુતો મહિત્વનં દીર્ઘં તતાન સૂર્યો ન યોજનમ્ ।
એતા ન યામે અગૃભીતશોચિષો ઽનશ્વદાં યન્ ન્ય્ અયાતના ગિરિમ્ ॥

અભ્રાજિ શર્ધો મરુતો યદ્ અર્ણસમ્ મોષથા વૃક્ષં કપનેવ વેધસઃ ।
અધ સ્મા નો અરમતિં સજોષસશ્ ચક્ષુર્ ઇવ યન્તમ્ અનુ નેષથા સુગમ્ ॥

ન સ જીયતે મરુતો ન હન્યતે ન સ્રેધતિ ન વ્યથતે ન રિષ્યતિ ।
નાસ્ય રાય ઉપ દસ્યન્તિ નોતય ઋષિં વા યં રાજાનં વા સુષૂદથ ॥

નિયુત્વન્તો ગ્રામજિતો યથા નરો ઽર્યમણો ન મરુતઃ કબન્ધિનઃ ।
પિન્વન્ત્ય્ ઉત્સં યદ્ ઇનાસો અસ્વરન્ વ્ય્ ઉન્દન્તિ પૃથિવીમ્ મધ્વો અન્ધસા ॥

પ્રવત્વતીયમ્ પૃથિવી મરુદ્ભ્યઃ પ્રવત્વતી દ્યૌર્ ભવતિ પ્રયદ્ભ્યઃ ।
પ્રવત્વતીઃ પથ્યા અન્તરિક્ષ્યાઃ પ્રવત્વન્તઃ પર્વતા જીરદાનવઃ ॥

યન્ મરુતઃ સભરસઃ સ્વર્ણરઃ સૂર્ય ઉદિતે મદથા દિવો નરઃ ।
ન વો ઽશ્વાઃ શ્રથયન્તાહ સિસ્રતઃ સદ્યો અસ્યાધ્વનઃ પારમ્ અશ્નુથ ॥

અંસેષુ વ ઋષ્ટયઃ પત્સુ ખાદયો વક્ષઃસુ રુક્મા મરુતો રથે શુભઃ ।
અગ્નિભ્રાજસો વિદ્યુતો ગભસ્ત્યોઃ શિપ્રાઃ શીર્ષસુ વિતતા હિરણ્યયીઃ ॥

તં નાકમ્ અર્યો અગૃભીતશોચિષં રુશત્ પિપ્પલમ્ મરુતો વિ ધૂનુથ ।
સમ્ અચ્યન્ત વૃજનાતિત્વિષન્ત યત્ સ્વરન્તિ ઘોષં વિતતમ્ ઋતાયવઃ ॥

યુષ્માદત્તસ્ય મરુતો વિચેતસો રાયઃ સ્યામ રથ્યો3 વયસ્વતઃ ।
ન યો યુચ્છતિ તિષ્યો3 યથા દિવો3 ઽસ્મે રારન્ત મરુતઃ સહસ્રિણમ્ ॥

યૂયં રયિમ્ મરુતઃ સ્પાર્હવીરં યૂયમ્ ઋષિમ્ અવથ સામવિપ્રમ્ ।
યૂયમ્ અર્વન્તમ્ ભરતાય વાજં યૂયં ધત્થ રાજાનં શ્રુષ્ટિમન્તમ્ ॥

તદ્ વો યામિ દ્રવિણં સદ્યઊતયો યેના સ્વ1ર્ ણ તતનામ નૄઁર્ અભિ ।
ઇદં સુ મે મરુતો હર્યતા વચો યસ્ય તરેમ તરસા શતં હિમાઃ ॥