Rig Veda · Chapter 5.043

ā dhenavaḥ payasā tūrṇyarthā amardhantīr upa no yantu madhvā |
maho rāye bṛhatīḥ sapta vipro mayobhuvo jaritā johavīti ||

ā suṣṭutī namasā vartayadhyai dyāvā vājāya pṛthivī amṛdhre |
pitā mātā madhuvacāḥ suhastā bhare-bhare no yaśasāv aviṣṭām ||

adhvaryavaś cakṛvāṁso madhūni pra vāyave bharata cāru śukram |
hoteva naḥ prathamaḥ pāhy asya deva madhvo rarimā te madāya ||

daśa kṣipo yuñjate bāhū adriṁ somasya yā śamitārā suhastā |
madhvo rasaṁ sugabhastir giriṣṭhāṁ caniścadad duduhe śukram aṁśuḥ ||

asāvi te jujuṣāṇāya somaḥ kratve dakṣāya bṛhate madāya |
harī rathe sudhurā yoge arvāg indra priyā kṛṇuhi hūyamānaḥ ||

ā no mahīm aramatiṁ sajoṣā gnāṁ devīṁ namasā rātahavyām |
madhor madāya bṛhatīm ṛtajñām āgne vaha pathibhir devayānaiḥ ||

añjanti yam prathayanto na viprā vapāvantaṁ nāgninā tapantaḥ |
pitur na putra upasi preṣṭha ā gharmo agnim ṛtayann asādi ||

acchā mahī bṛhatī śaṁtamā gīr dūto na gantv aśvinā huvadhyai |
mayobhuvā sarathā yātam arvāg gantaṁ nidhiṁ dhuram āṇir na nābhim ||

pra tavyaso namaüktiṁ turasyāham pūṣṇa uta vāyor adikṣi |
yā rādhasā coditārā matīnāṁ yā vājasya draviṇodā uta tman ||

ā nāmabhir maruto vakṣi viśvān ā rūpebhir jātavedo huvānaḥ |
yajñaṁ giro jarituḥ suṣṭutiṁ ca viśve ganta maruto viśva ūtī ||

ā no divo bṛhataḥ parvatād ā sarasvatī yajatā gantu yajñam |
havaṁ devī jujuṣāṇā ghṛtācī śagmāṁ no vācam uśatī śṛṇotu ||

ā vedhasaṁ nīlapṛṣṭham bṛhantam bṛhaspatiṁ sadane sādayadhvam |
sādadyoniṁ dama ā dīdivāṁsaṁ hiraṇyavarṇam aruṣaṁ sapema ||

ā dharṇasir bṛhaddivo rarāṇo viśvebhir gantv omabhir huvānaḥ |
gnā vasāna oṣadhīr amṛdhras tridhātuśṛṅgo vṛṣabho vayodhāḥ ||

mātuṣ pade parame śukra āyor vipanyavo rāspirāso agman |
suśevyaṁ namasā rātahavyāḥ śiśum mṛjanty āyavo na vāse ||

bṛhad vayo bṛhate tubhyam agne dhiyājuro mithunāsaḥ sacanta |
devo-devaḥ suhavo bhūtu mahyam mā no mātā pṛthivī durmatau dhāt ||

urau devā anibādhe syāma ||

sam aśvinor avasā nūtanena mayobhuvā supraṇītī gamema |
ā no rayiṁ vahatam ota vīrān ā viśvāny amṛtā saubhagāni ||