Rig Veda · Chapter 5.042

pra śaṁtamā varuṇaṁ dīdhitī gīr mitram bhagam aditiṁ nūnam aśyāḥ |
pṛṣadyoniḥ pañcahotā śṛṇotv atūrtapanthā asuro mayobhuḥ ||

prati me stomam aditir jagṛbhyāt sūnuṁ na mātā hṛdyaṁ suśevam |
brahma priyaṁ devahitaṁ yad asty aham mitre varuṇe yan mayobhu ||

ud īraya kavitamaṁ kavīnām unattainam abhi madhvā ghṛtena |
sa no vasūni prayatā hitāni candrāṇi devaḥ savitā suvāti ||

sam indra ṇo manasā neṣi gobhiḥ saṁ sūribhir harivaḥ saṁ svasti |
sam brahmaṇā devahitaṁ yad asti saṁ devānāṁ sumatyā yajñiyānām ||

devo bhagaḥ savitā rāyo aṁśa indro vṛtrasya saṁjito dhanānām |
ṛbhukṣā vāja uta vā puraṁdhir avantu no amṛtāsas turāsaḥ ||

marutvato apratītasya jiṣṇor ajūryataḥ pra bravāmā kṛtāni |
na te pūrve maghavan nāparāso na vīrya1ṁ nūtanaḥ kaś canāpa ||

upa stuhi prathamaṁ ratnadheyam bṛhaspatiṁ sanitāraṁ dhanānām |
yaḥ śaṁsate stuvate śambhaviṣṭhaḥ purūvasur āgamaj johuvānam ||

tavotibhiḥ sacamānā ariṣṭā bṛhaspate maghavānaḥ suvīrāḥ |
ye aśvadā uta vā santi godā ye vastradāḥ subhagās teṣu rāyaḥ ||

visarmāṇaṁ kṛṇuhi vittam eṣāṁ ye bhuñjate apṛṇanto na ukthaiḥ |
apavratān prasave vāvṛdhānān brahmadviṣaḥ sūryād yāvayasva ||

ya ohate rakṣaso devavītāv acakrebhis tam maruto ni yāta |
yo vaḥ śamīṁ śaśamānasya nindāt tucchyān kāmān karate siṣvidānaḥ ||

tam u ṣṭuhi yaḥ sviṣuḥ sudhanvā yo viśvasya kṣayati bheṣajasya |
yakṣvā mahe saumanasāya rudraṁ namobhir devam asuraṁ duvasya ||

damūnaso apaso ye suhastā vṛṣṇaḥ patnīr nadyo vibhvataṣṭāḥ |
sarasvatī bṛhaddivota rākā daśasyantīr varivasyantu śubhrāḥ ||

pra sū mahe suśaraṇāya medhāṁ giram bhare navyasīṁ jāyamānām |
ya āhanā duhitur vakṣaṇāsu rūpā mināno akṛṇod idaṁ naḥ ||

pra suṣṭutiḥ stanayantaṁ ruvantam iḻas patiṁ jaritar nūnam aśyāḥ |
yo abdimām̐ udanimām̐ iyarti pra vidyutā rodasī ukṣamāṇaḥ ||

eṣa stomo mārutaṁ śardho acchā rudrasya sūnūm̐r yuvanyūm̐r ud aśyāḥ |
kāmo rāye havate mā svasty upa stuhi pṛṣadaśvām̐ ayāsaḥ ||

praiṣa stomaḥ pṛthivīm antarikṣaṁ vanaspatīm̐r oṣadhī rāye aśyāḥ |
devo-devaḥ suhavo bhūtu mahyam mā no mātā pṛthivī durmatau dhāt ||

urau devā anibādhe syāma ||

sam aśvinor avasā nūtanena mayobhuvā supraṇītī gamema |
ā no rayiṁ vahatam ota vīrān ā viśvāny amṛtā saubhagāni ||