Rig Veda · Chapter 4.057

kṣetrasya patinā vayaṁ hiteneva jayāmasi |
gām aśvam poṣayitnv ā sa no mṛḻātīdṛśe ||

kṣetrasya pate madhumantam ūrmiṁ dhenur iva payo asmāsu dhukṣva |
madhuścutaṁ ghṛtam iva supūtam ṛtasya naḥ patayo mṛḻayantu ||

madhumatīr oṣadhīr dyāva āpo madhuman no bhavatv antarikṣam |
kṣetrasya patir madhumān no astv ariṣyanto anv enaṁ carema ||

śunaṁ vāhāḥ śunaṁ naraḥ śunaṁ kṛṣatu lāṅgalam |
śunaṁ varatrā badhyantāṁ śunam aṣṭrām ud iṅgaya ||

śunāsīrāv imāṁ vācaṁ juṣethāṁ yad divi cakrathuḥ payaḥ |
tenemām upa siñcatam ||

arvācī subhage bhava sīte vandāmahe tvā |
yathā naḥ subhagāsasi yathā naḥ suphalāsasi ||

indraḥ sītāṁ ni gṛhṇātu tām pūṣānu yacchatu |
sā naḥ payasvatī duhām uttarām-uttarāṁ samām ||

śunaṁ naḥ phālā vi kṛṣantu bhūmiṁ śunaṁ kīnāśā abhi yantu vāhaiḥ |
śunam parjanyo madhunā payobhiḥ śunāsīrā śunam asmāsu dhattam ||