Rig Veda · Chapter 4.056

mahī dyāvāpṛthivī iha jyeṣṭhe rucā bhavatāṁ śucayadbhir arkaiḥ |
yat sīṁ variṣṭhe bṛhatī viminvan ruvad dhokṣā paprathānebhir evaiḥ ||

devī devebhir yajate yajatrair aminatī tasthatur ukṣamāṇe |
ṛtāvarī adruhā devaputre yajñasya netrī śucayadbhir arkaiḥ ||

sa it svapā bhuvaneṣv āsa ya ime dyāvāpṛthivī jajāna |
urvī gabhīre rajasī sumeke avaṁśe dhīraḥ śacyā sam airat ||

nū rodasī bṛhadbhir no varūthaiḥ patnīvadbhir iṣayantī sajoṣāḥ |
urūcī viśve yajate ni pātaṁ dhiyā syāma rathyaḥ sadāsāḥ ||

pra vām mahi dyavī abhy upastutim bharāmahe |
śucī upa praśastaye ||

punāne tanvā mithaḥ svena dakṣeṇa rājathaḥ |
ūhyāthe sanād ṛtam ||

mahī mitrasya sādhathas tarantī pipratī ṛtam |
pari yajñaṁ ni ṣedathuḥ ||