Rig Veda · Chapter 4.019

evā tvām indra vajrinn atra viśve devāsaḥ suhavāsa ūmāḥ |
mahām ubhe rodasī vṛddham ṛṣvaṁ nir ekam id vṛṇate vṛtrahatye ||

avāsṛjanta jivrayo na devā bhuvaḥ samrāḻ indra satyayoniḥ |
ahann ahim pariśayānam arṇaḥ pra vartanīr arado viśvadhenāḥ ||

atṛpṇuvantaṁ viyatam abudhyam abudhyamānaṁ suṣupāṇam indra |
sapta prati pravata āśayānam ahiṁ vajreṇa vi riṇā aparvan ||

akṣodayac chavasā kṣāma budhnaṁ vār ṇa vātas taviṣībhir indraḥ |
dṛḻhāny aubhnād uśamāna ojo 'vābhinat kakubhaḥ parvatānām ||

abhi pra dadrur janayo na garbhaṁ rathā iva pra yayuḥ sākam adrayaḥ |
atarpayo visṛta ubja ūrmīn tvaṁ vṛtām̐ ariṇā indra sindhūn ||

tvam mahīm avaniṁ viśvadhenāṁ turvītaye vayyāya kṣarantīm |
aramayo namasaijad arṇaḥ sutaraṇām̐ akṛṇor indra sindhūn ||

prāgruvo nabhanvo3 na vakvā dhvasrā apinvad yuvatīr ṛtajñāḥ |
dhanvāny ajrām̐ apṛṇak tṛṣāṇām̐ adhog indraḥ staryo3 daṁsupatnīḥ ||

pūrvīr uṣasaḥ śaradaś ca gūrtā vṛtraṁ jaghanvām̐ asṛjad vi sindhūn |
pariṣṭhitā atṛṇad badbadhānāḥ sīrā indraḥ sravitave pṛthivyā ||

vamrībhiḥ putram agruvo adānaṁ niveśanād dhariva ā jabhartha |
vy a1ndho akhyad ahim ādadāno nir bhūd ukhacchit sam aranta parva ||

pra te pūrvāṇi karaṇāni viprāvidvām̐ āha viduṣe karāṁsi |
yathā-yathā vṛṣṇyāni svagūrtāpāṁsi rājan naryāviveṣīḥ ||

nū ṣṭuta indra nū gṛṇāna iṣaṁ jaritre nadyo3 na pīpeḥ |
akāri te harivo brahma navyaṁ dhiyā syāma rathyaḥ sadāsāḥ ||