ઋગ્વેદ · અધ્યાય 4.019

એવા ત્વામ્ ઇન્દ્ર વજ્રિન્ન્ અત્ર વિશ્વે દેવાસઃ સુહવાસ ઊમાઃ ।
મહામ્ ઉભે રોદસી વૃદ્ધમ્ ઋષ્વં નિર્ એકમ્ ઇદ્ વૃણતે વૃત્રહત્યે ॥

અવાસૃજન્ત જિવ્રયો ન દેવા ભુવઃ સમ્રાળ્ ઇન્દ્ર સત્યયોનિઃ ।
અહન્ન્ અહિમ્ પરિશયાનમ્ અર્ણઃ પ્ર વર્તનીર્ અરદો વિશ્વધેનાઃ ॥

અતૃપ્ણુવન્તં વિયતમ્ અબુધ્યમ્ અબુધ્યમાનં સુષુપાણમ્ ઇન્દ્ર ।
સપ્ત પ્રતિ પ્રવત આશયાનમ્ અહિં વજ્રેણ વિ રિણા અપર્વન્ ॥

અક્ષોદયચ્ છવસા ક્ષામ બુધ્નં વાર્ ણ વાતસ્ તવિષીભિર્ ઇન્દ્રઃ ।
દૃળ્હાન્ય્ ઔભ્નાદ્ ઉશમાન ઓજો ઽવાભિનત્ કકુભઃ પર્વતાનામ્ ॥

અભિ પ્ર દદ્રુર્ જનયો ન ગર્ભં રથા ઇવ પ્ર યયુઃ સાકમ્ અદ્રયઃ ।
અતર્પયો વિસૃત ઉબ્જ ઊર્મીન્ ત્વં વૃતાઁ અરિણા ઇન્દ્ર સિન્ધૂન્ ॥

ત્વમ્ મહીમ્ અવનિં વિશ્વધેનાં તુર્વીતયે વય્યાય ક્ષરન્તીમ્ ।
અરમયો નમસૈજદ્ અર્ણઃ સુતરણાઁ અકૃણોર્ ઇન્દ્ર સિન્ધૂન્ ॥

પ્રાગ્રુવો નભન્વો3 ન વક્વા ધ્વસ્રા અપિન્વદ્ યુવતીર્ ઋતજ્ઞાઃ ।
ધન્વાન્ય્ અજ્રાઁ અપૃણક્ તૃષાણાઁ અધોગ્ ઇન્દ્રઃ સ્તર્યો3 દંસુપત્નીઃ ॥

પૂર્વીર્ ઉષસઃ શરદશ્ ચ ગૂર્તા વૃત્રં જઘન્વાઁ અસૃજદ્ વિ સિન્ધૂન્ ।
પરિષ્ઠિતા અતૃણદ્ બદ્બધાનાઃ સીરા ઇન્દ્રઃ સ્રવિતવે પૃથિવ્યા ॥

વમ્રીભિઃ પુત્રમ્ અગ્રુવો અદાનં નિવેશનાદ્ ધરિવ આ જભર્થ ।
વ્ય્ અ1ન્ધો અખ્યદ્ અહિમ્ આદદાનો નિર્ ભૂદ્ ઉખચ્છિત્ સમ્ અરન્ત પર્વ ॥

પ્ર તે પૂર્વાણિ કરણાનિ વિપ્રાવિદ્વાઁ આહ વિદુષે કરાંસિ ।
યથા-યથા વૃષ્ણ્યાનિ સ્વગૂર્તાપાંસિ રાજન્ નર્યાવિવેષીઃ ॥

નૂ ષ્ટુત ઇન્દ્ર નૂ ગૃણાન ઇષં જરિત્રે નદ્યો3 ન પીપેઃ ।
અકારિ તે હરિવો બ્રહ્મ નવ્યં ધિયા સ્યામ રથ્યઃ સદાસાઃ ॥