Rig Veda · Chapter 4.018

ayam panthā anuvittaḥ purāṇo yato devā udajāyanta viśve |
ataś cid ā janiṣīṣṭa pravṛddho mā mātaram amuyā pattave kaḥ ||

nāham ato nir ayā durgahaitat tiraścatā pārśvān nir gamāṇi |
bahūni me akṛtā kartvāni yudhyai tvena saṁ tvena pṛcchai ||

parāyatīm mātaram anv acaṣṭa na nānu gāny anu nū gamāni |
tvaṣṭur gṛhe apibat somam indraḥ śatadhanyaṁ camvoḥ sutasya ||

kiṁ sa ṛdhak kṛṇavad yaṁ sahasram māso jabhāra śaradaś ca pūrvīḥ |
nahī nv asya pratimānam asty antar jāteṣūta ye janitvāḥ ||

avadyam iva manyamānā guhākar indram mātā vīryeṇā nyṛṣṭam |
athod asthāt svayam atkaṁ vasāna ā rodasī apṛṇāj jāyamānaḥ ||

etā arṣanty alalābhavantīr ṛtāvarīr iva saṁkrośamānāḥ |
etā vi pṛccha kim idam bhananti kam āpo adrim paridhiṁ rujanti ||

kim u ṣvid asmai nivido bhanantendrasyāvadyaṁ didhiṣanta āpaḥ |
mamaitān putro mahatā vadhena vṛtraṁ jaghanvām̐ asṛjad vi sindhūn ||

mamac cana tvā yuvatiḥ parāsa mamac cana tvā kuṣavā jagāra |
mamac cid āpaḥ śiśave mamṛḍyur mamac cid indraḥ sahasod atiṣṭhat ||

mamac cana te maghavan vyaṁso nivividhvām̐ apa hanū jaghāna |
adhā nividdha uttaro babhūvāñ chiro dāsasya sam piṇag vadhena ||

gṛṣṭiḥ sasūva sthaviraṁ tavāgām anādhṛṣyaṁ vṛṣabhaṁ tumram indram |
arīḻhaṁ vatsaṁ carathāya mātā svayaṁ gātuṁ tanva icchamānam ||

uta mātā mahiṣam anv avenad amī tvā jahati putra devāḥ |
athābravīd vṛtram indro haniṣyan sakhe viṣṇo vitaraṁ vi kramasva ||

kas te mātaraṁ vidhavām acakrac chayuṁ kas tvām ajighāṁsac carantam |
kas te devo adhi mārḍīka āsīd yat prākṣiṇāḥ pitaram pādagṛhya ||

avartyā śuna āntrāṇi pece na deveṣu vivide marḍitāram |
apaśyaṁ jāyām amahīyamānām adhā me śyeno madhv ā jabhāra ||