ઋગ્વેદ · અધ્યાય 4.018

અયમ્ પન્થા અનુવિત્તઃ પુરાણો યતો દેવા ઉદજાયન્ત વિશ્વે ।
અતશ્ ચિદ્ આ જનિષીષ્ટ પ્રવૃદ્ધો મા માતરમ્ અમુયા પત્તવે કઃ ॥

નાહમ્ અતો નિર્ અયા દુર્ગહૈતત્ તિરશ્ચતા પાર્શ્વાન્ નિર્ ગમાણિ ।
બહૂનિ મે અકૃતા કર્ત્વાનિ યુધ્યૈ ત્વેન સં ત્વેન પૃચ્છૈ ॥

પરાયતીમ્ માતરમ્ અન્વ્ અચષ્ટ ન નાનુ ગાન્ય્ અનુ નૂ ગમાનિ ।
ત્વષ્ટુર્ ગૃહે અપિબત્ સોમમ્ ઇન્દ્રઃ શતધન્યં ચમ્વોઃ સુતસ્ય ॥

કિં સ ઋધક્ કૃણવદ્ યં સહસ્રમ્ માસો જભાર શરદશ્ ચ પૂર્વીઃ ।
નહી ન્વ્ અસ્ય પ્રતિમાનમ્ અસ્ત્ય્ અન્તર્ જાતેષૂત યે જનિત્વાઃ ॥

અવદ્યમ્ ઇવ મન્યમાના ગુહાકર્ ઇન્દ્રમ્ માતા વીર્યેણા ન્યૃષ્ટમ્ ।
અથોદ્ અસ્થાત્ સ્વયમ્ અત્કં વસાન આ રોદસી અપૃણાજ્ જાયમાનઃ ॥

એતા અર્ષન્ત્ય્ અલલાભવન્તીર્ ઋતાવરીર્ ઇવ સંક્રોશમાનાઃ ।
એતા વિ પૃચ્છ કિમ્ ઇદમ્ ભનન્તિ કમ્ આપો અદ્રિમ્ પરિધિં રુજન્તિ ॥

કિમ્ ઉ ષ્વિદ્ અસ્મૈ નિવિદો ભનન્તેન્દ્રસ્યાવદ્યં દિધિષન્ત આપઃ ।
મમૈતાન્ પુત્રો મહતા વધેન વૃત્રં જઘન્વાઁ અસૃજદ્ વિ સિન્ધૂન્ ॥

મમચ્ ચન ત્વા યુવતિઃ પરાસ મમચ્ ચન ત્વા કુષવા જગાર ।
મમચ્ ચિદ્ આપઃ શિશવે મમૃડ્યુર્ મમચ્ ચિદ્ ઇન્દ્રઃ સહસોદ્ અતિષ્ઠત્ ॥

મમચ્ ચન તે મઘવન્ વ્યંસો નિવિવિધ્વાઁ અપ હનૂ જઘાન ।
અધા નિવિદ્ધ ઉત્તરો બભૂવાઞ્ છિરો દાસસ્ય સમ્ પિણગ્ વધેન ॥

ગૃષ્ટિઃ સસૂવ સ્થવિરં તવાગામ્ અનાધૃષ્યં વૃષભં તુમ્રમ્ ઇન્દ્રમ્ ।
અરીળ્હં વત્સં ચરથાય માતા સ્વયં ગાતું તન્વ ઇચ્છમાનમ્ ॥

ઉત માતા મહિષમ્ અન્વ્ અવેનદ્ અમી ત્વા જહતિ પુત્ર દેવાઃ ।
અથાબ્રવીદ્ વૃત્રમ્ ઇન્દ્રો હનિષ્યન્ સખે વિષ્ણો વિતરં વિ ક્રમસ્વ ॥

કસ્ તે માતરં વિધવામ્ અચક્રચ્ છયું કસ્ ત્વામ્ અજિઘાંસચ્ ચરન્તમ્ ।
કસ્ તે દેવો અધિ માર્ડીક આસીદ્ યત્ પ્રાક્ષિણાઃ પિતરમ્ પાદગૃહ્ય ॥

અવર્ત્યા શુન આન્ત્રાણિ પેચે ન દેવેષુ વિવિદે મર્ડિતારમ્ ।
અપશ્યં જાયામ્ અમહીયમાનામ્ અધા મે શ્યેનો મધ્વ્ આ જભાર ॥