Rig Veda · Chapter 2.029

dhṛtavratā ādityā iṣirā āre mat karta rahasūr ivāgaḥ |
śṛṇvato vo varuṇa mitra devā bhadrasya vidvām̐ avase huve vaḥ ||

yūyaṁ devāḥ pramatir yūyam ojo yūyaṁ dveṣāṁsi sanutar yuyota |
abhikṣattāro abhi ca kṣamadhvam adyā ca no mṛḻayatāparaṁ ca ||

kim ū nu vaḥ kṛṇavāmāpareṇa kiṁ sanena vasava āpyena |
yūyaṁ no mitrāvaruṇādite ca svastim indrāmaruto dadhāta ||

haye devā yūyam id āpayaḥ stha te mṛḻata nādhamānāya mahyam |
mā vo ratho madhyamavāḻ ṛte bhūn mā yuṣmāvatsv āpiṣu śramiṣma ||

pra va eko mimaya bhūry āgo yan mā piteva kitavaṁ śaśāsa |
āre pāśā āre aghāni devā mā mādhi putre vim iva grabhīṣṭa ||

arvāñco adyā bhavatā yajatrā ā vo hārdi bhayamāno vyayeyam |
trādhvaṁ no devā nijuro vṛkasya trādhvaṁ kartād avapado yajatrāḥ ||

māham maghono varuṇa priyasya bhūridāvna ā vidaṁ śūnam āpeḥ |
mā rāyo rājan suyamād ava sthām bṛhad vadema vidathe suvīrāḥ ||