Rig Veda · Chapter 2.028

idaṁ kaver ādityasya svarājo viśvāni sānty abhy astu mahnā |
ati yo mandro yajathāya devaḥ sukīrtim bhikṣe varuṇasya bhūreḥ ||

tava vrate subhagāsaḥ syāma svādhyo varuṇa tuṣṭuvāṁsaḥ |
upāyana uṣasāṁ gomatīnām agnayo na jaramāṇā anu dyūn ||

tava syāma puruvīrasya śarmann uruśaṁsasya varuṇa praṇetaḥ |
yūyaṁ naḥ putrā aditer adabdhā abhi kṣamadhvaṁ yujyāya devāḥ ||

pra sīm ādityo asṛjad vidhartām̐ ṛtaṁ sindhavo varuṇasya yanti |
na śrāmyanti na vi mucanty ete vayo na paptū raghuyā parijman ||

vi mac chrathāya raśanām ivāga ṛdhyāma te varuṇa khām ṛtasya |
mā tantuś chedi vayato dhiyam me mā mātrā śāry apasaḥ pura ṛtoḥ ||

apo su myakṣa varuṇa bhiyasam mat samrāḻ ṛtāvo 'nu mā gṛbhāya |
dāmeva vatsād vi mumugdhy aṁho nahi tvad āre nimiṣaś caneśe ||

mā no vadhair varuṇa ye ta iṣṭāv enaḥ kṛṇvantam asura bhrīṇanti |
mā jyotiṣaḥ pravasathāni ganma vi ṣū mṛdhaḥ śiśratho jīvase naḥ ||

namaḥ purā te varuṇota nūnam utāparaṁ tuvijāta bravāma |
tve hi kam parvate na śritāny apracyutāni dūḻabha vratāni ||

para ṛṇā sāvīr adha matkṛtāni māhaṁ rājann anyakṛtena bhojam |
avyuṣṭā in nu bhūyasīr uṣāsa ā no jīvān varuṇa tāsu śādhi ||

yo me rājan yujyo vā sakhā vā svapne bhayam bhīrave mahyam āha |
steno vā yo dipsati no vṛko vā tvaṁ tasmād varuṇa pāhy asmān ||

māham maghono varuṇa priyasya bhūridāvna ā vidaṁ śūnam āpeḥ |
mā rāyo rājan suyamād ava sthām bṛhad vadema vidathe suvīrāḥ ||