Rig Veda · Chapter 10.146

araṇyāny araṇyāny asau yā preva naśyasi |
kathā grāmaṁ na pṛcchasi na tvā bhīr iva vindatī3m̐ ||

vṛṣāravāya vadate yad upāvati ciccikaḥ |
āghāṭibhir iva dhāvayann araṇyānir mahīyate ||

uta gāva ivādanty uta veśmeva dṛśyate |
uto araṇyāniḥ sāyaṁ śakaṭīr iva sarjati ||

gām aṅgaiṣa ā hvayati dārv aṅgaiṣo apāvadhīt |
vasann araṇyānyāṁ sāyam akrukṣad iti manyate ||

na vā araṇyānir hanty anyaś cen nābhigacchati |
svādoḥ phalasya jagdhvāya yathākāmaṁ ni padyate ||

āñjanagandhiṁ surabhim bahvannām akṛṣīvalām |
prāham mṛgāṇām mātaram araṇyānim aśaṁsiṣam ||