Rig Veda · Chapter 10.134

ubhe yad indra rodasī āpaprāthoṣā iva |
mahāntaṁ tvā mahīnāṁ samrājaṁ carṣaṇīnāṁ devī janitry ajījanad bhadrā janitry ajījanat ||

ava sma durhaṇāyato martasya tanuhi sthiram |
adhaspadaṁ tam īṁ kṛdhi yo asmām̐ ādideśati devī janitry ajījanad bhadrā janitry ajījanat ||

ava tyā bṛhatīr iṣo viśvaścandrā amitrahan |
śacībhiḥ śakra dhūnuhīndra viśvābhir ūtibhir devī janitry ajījanad bhadrā janitry ajījanat ||

ava yat tvaṁ śatakratav indra viśvāni dhūnuṣe |
rayiṁ na sunvate sacā sahasriṇībhir ūtibhir devī janitry ajījanad bhadrā janitry ajījanat ||

ava svedā ivābhito viṣvak patantu didyavaḥ |
dūrvāyā iva tantavo vy a1smad etu durmatir devī janitry ajījanad bhadrā janitry ajījanat ||

dīrghaṁ hy aṅkuśaṁ yathā śaktim bibharṣi mantumaḥ |
pūrveṇa maghavan padājo vayāṁ yathā yamo devī janitry ajījanad bhadrā janitry ajījanat ||

nakir devā minīmasi nakir ā yopayāmasi mantraśrutyaṁ carāmasi |
pakṣebhir apikakṣebhir atrābhi saṁ rabhāmahe ||